Duzmeuz gyaez loenghriu, ciengz daeuq ndaej daihgya angqvauvau, hoeng de hix gyaez loengh vunz, loengh ndaej daihgya simnyap raixcaix.

Ngoenz ndeu, duzmeuz yawjraen duzgaeq song cejnuengx youq laj cazfaex gangjgoj, de ndawsim couh naemj: “Hwhw, song dah mbeiiq neix, gou yaek hwk songde mbat ndeu cij ndaej.” Naemj dwk, duzmeuz couh yaemjyaemj ndonj daengz baihlaeng duzgaeq, fwt coemj gvaqbae haenq sing baez hat:“Ha!” Duzgaeq deng hwk ndaej swenjcece mbin hwnj- daeuj. Duzmeuz raen le, angq ndaej bekfwngz riuhaha, caemhcaiq vix duzgaeq riu naeuz:“Haha, duzgaeq mbeiiq, swenj cici caca, mbin gafi gafaq!” Duzgaeq hozndat naeuz: “Mwngz duz simnaeuh neix, hwk ndaej dou mbei yaek dek bae!” Duzmeuz ndawsim cix angq dangqmaz.

Duzmeuz angqvauvau youh daeujdaengz gwnz diegrum, yawjraen duzyiengz daxgoeng cingq youq giz mbouj gyae maezmwdmwd yawj bauqceij. De youh yaemjyaemj byaij gvaqbae, ndwn youq baihlaeng daxgoeng duzyiengz, nyaenx dwk riu, fwt dawz fouq nganxgingq daxgoeng duzyiengz roengzdaeuj, hwk ndaej daxgoeng duzyiengz sim diuqbubbub. Duzyiengz daxgoeng riu ndaq naeuz: “Duz fangzlwg neix, vaiqdi dawz nganxgingq daeuj hawj gou, mbouj ndaej daujluenh.” Duzmeuz daekeiq fwngfwng dwk dawz nganxgingq daep hwnjdaeuj, hoeng de sikhaek gamj- daengz daraiz dava, cijndaej duet nganxgingq roengzdaeuj boiz hawj duzyiengz daxgoeng lo.

Duzmeuz youq gwnz diegrum byaij le yaep he, fwt raen duz- coengmax ndeu cingq youq gizhaenx dak ndit, de youh siengj loengh vunz lo. De fwt coemj gvaqbae, gaemh dawz duzcoengmax, ajbak couh haeb. Duzcoengmax lingzleih dangqmaz, ciengjgonq haeb dawz byai linx duzmeuz. Duzmeuz in lo, siengj fid coengmax doek bae, hoeng, coengmax haeb ndaej engq ndaet lo. Duzmeuz doeng fid sae fid, coengmax cungj mbouj cuengq. Duzmeuz youh suk linx, siengj gienj coengmax haeuj bak bae haeb, hoeng, coengmax song ga dingj naengbak de, haenqrengz rag linx de okdaeuj, de baenzlawz hix suk mbouj ndaej linx haeuj bak bae. Yienghneix, diuzlinx duzmeuz couh deng rag ndaej raezramram bad youq rog bak. Coengmax lij daekeiq dwk yungh song cik galaeng baez naek baez mbaeu caij dwk bekceij, ndaw bak ngwngw ciengqgo, gamz dwk diuzlinx duzmeuz bibi buengqbuengq diuqfoux hwnjdaeuj. Duzmeuz indot yaek dai, fidfid fouxfoux, saet bae saet dauq.

Duzmeuz in ndaej raemxda laenengneng roengzdaeuj, siengj gouznyiuz cix gangj mbouj ndaej vah. Cingq youq seizneix, duzyiengz daxgoeng gvaqdaeuj lo, de doiq coengmax naeuz: “Cuengq de ba!”

Duzcoengmax baez cuengq bak couh riengjret yat daengz gwnzdieg, lij miz di hozndat dwk doiq duzmeuz naeuz: “Mwngz loengh gou haeb gou, daengz gou hix loengh mwngz haeb mwngz, hawj mwngz rox in mbouj in! ”

Duzgaeq caeuq duzyiengz cungj humx gvaqdaeuj lo, cungj naeuz duzmeuz:“Baezneix mwngz rox hit luba?”

Duzmeuz najmong liux lo, de hojlienz dwk mbajmbwtmbwt han naeuz:“Baezlaeng, gou…… caiq…… hix mbouj…… loengh vunz lo.”

(Ganh Sozvwnz/甘说文)