Haetneix gaeq bakmbaeu,

Senq han naeuz angqyangz;

Cunghgoz gungcanjdangj,

Gangj hai Cibgouj Daih.

Youq ndaw singz Baekging,

Venj baengznding ceijloeg;

Gyonglaz hemqsoegsoeg,

Sing moek daengx roen haw.

Guek raeuz gensez ndi(ndei),

Bienq fouqmiz maenh’ak;

Ndaem faex ndaej baenzmak,

Doh dieg bak ndaej gwn.

Daj Cibbet Daih ma,

Gaijgwz nda hwnj mbaek;

Lijlun caemh haeuj laeg,

Baenz daegsaek guekgya.

Ginghci mbefat nyaemz,

Minzswngh gaem ndaej hwnj;

Saehnieb bae ndaej swnh,

Angjdin swnj ndaej caez.

Miz “it sai it loh”,

Gak guek goj camgya;

Yadouzhangz rengz na,

Va cienz bang guekwnq.

Guekgya aeu ceih dangj,

Fanjfuj gangj okrengz;

Dam caiz couh mbouj deng,

Dingj geng engq ngaiz gaemh.

Cibgouj Daih yaek hai,

Eiqseiq goulau naek;

Gaijgwz aiq haeuj laeg,

Aeu mbaet rengz caj guh.

Hai hoih lwnh saeh naek,

Ndwn sang daek(san) saehhung;

Dingh fuengcim bae gung,

Yungh cwngcwz bae gej.

Daih saeh dingh bak nienz,

Loh hung sien ngonz cinj;

Baihnaj miz dangj yinx,

Diem din ndaej bae vaiq.

Laeb dangj daengz bak bi,

Ndi(ndei) saedyienh siujgangh;

Laeb guek bak nienz sang,

Angq raen Cungguekloq.

Cibgouj Daih hungmbwk,

Dangj yinx dwg maqmuengh;

Gaen riengz dangj mbouj cuengq,

Muengh fanh bi vuenyungz.