Daegcoengh mbouj lijgaij cam naeuz: “Ndaw doz cij miz dahniq boux dog, de baenzlawz gangj vah ne? Dwg gag gangj gag naeuz ba?”

“Mbouj itdingh bw. Lumj mbwn gig nit, baihrog bongjrumz roengzsiet, daxmeh de itdingh gig sim’in de, heuh de gaej bae lo, fanjcingq daihgya cungj rox ngoenzneix roengzsiet. Hoeng de genhciz yaek bae, de lwnh daxmeh naeuz:“Dienheiq yawhbauq gwnz densi caeuq ndaw gvangjbo, couhdwg daj gij cingzgvang haujlai dieg gisieng cazyawj comz hwnjdaeuj cij ndaej okdaeuj. Gij cingzgvang dieg gisieng cazyawj dou mbouj ndaej noix, mboujnex yawhbauq couh mbouj cinj lo.

Mehnax daezdiemj sawj Daeg- coengh fwt rox lo: “Deng. Dahniq neix youq mwh ciepsouh yinvu, cancangj lauheiq hix mbouj cuengqsim, siengj vuenh lwgsai roxnaeuz dahsau nienzgeij haemq hung bae. Hoeng de giendingh naeuz: ‘Gou hag gvaq song bi gisieng cihsiz, youq gisieng cihsiz doxdax ndaw hagdangz gawjhengz haenx ndaej gvaq itdaengjciengj, gou itdingh guh ndaej ndei gij hong gisiengyenz.’ Lij miz baez ndeu, de dwgliengz lo, gij doengzhag wnq cungj naeuz lawh de bae dieg gisieng cazyawj geiq cingzgvang dienheiq, de cungj mbouj dapwngq: ‘Sou gak boux gag miz saeh swhgeij, di dwgliengz neix suenq gijmaz, gou gag bae ndaej.’”

Mehnax siengj mbouj daengz Daegcoengh fanjying ndaej baenzlai vaiq, nyaenx mbouj ndaej bek fwngz hwnjdaeuj. “Daegcoengh caen coengmingz, baez daezdiemj couh rox lo.” (4)