“Deng lo.” Mehnax cam, “Gij- neix hawj dahniq ndaw doz daiq daeuj gijmaz ne?”

Daegcoengh siengjsiengj le, naeuz:“Dieg cazyawj gisieng liz giz dieg vunz youq haenx haemq gyae, dahniq caeuxcaeux couh hwnqdaeuj, dingj rumz soemh siet bae cazyawj gisieng cingzgvang, geiq ‘dienheiq ngoenzneix’, gig mbouj fuengbienh.”

Mehnax naeuz:“Baihlaj mwngz couh yaek siengjsiengj, dahniq ndaw doz youq gij cingzgvang dangseiz, dwg baenzlawz siengj、baenzlawz gangj、baenzlawz guh.”

Daegcoengh daegdaengq naeuz: “De dwg baenzlawz siengj、baenzlawz gangj、baenzlawz guh, ndaw doz mbouj sij okdaeuj, gou baenzlawz rox ha?”

“Mwngz dwg mbouj dwg siengj heuh gou bang mwngz gangj bien cozvwnz neix okdaeuj liux bae ha?”Mehnax guj ok gij siengjfap Daeg- coengh, riuriu le, ciepdwk naeuz, “Mwngz siengjsiengj, dah niq he, youq gyanghaet seiznit, dingj rumz soemh siet, byaij baenz gyae loh, bae cazyawj gisieng cingzgvang, geiq ‘dienheiq ngoenzneix’, yungzheih lwi?”

Daegcoengh naeuz:“Cingqcaen mbouj yungzheih. Mbwn baenz nit, youh dwg gyanghaet, raeuz lij youq ndawdenz ninz ne. Gou siengj, de youq dienheiq yakrwix roengzsiet bongjrumz neix bae geiq gisieng cingzgvang, caen dwg gienh saeh mbouj yungzheih he.”

“Gangj ndaej deng.” Mehnax laebdaeb dazyinx, cam, “Gijneix ndaej fanjyingj ok dahniq gijmaz cingsaenz ne?”

“Mbouj lau sinhoj.”

“W.”

“Genhciz mbouj cuengqsoeng.”

“Deng. Lij ndaej mbouj ndaej engq laegdaeuq di?”

“Lij miz doiq gunghcoz gig fucwz.”

Mehnax lwnh Daegcoengh: “Neix couhdwg eiqsei laegdaeuq cozvwnz. Baihlaj mwngz heux aen eiqsei neix, caenh’itbouh gidij bae siengj, aeu dahniq neix siengj baenz bouxvunz henz ndang mwngz, sawj boux vunz neix sengdoengh hwnjdaeuj. Lumj de miz gij biujcingz baenzlawz yiengh, de youq ndaw rumzsiet baenzlawz byaij loh, de gangj le gijmaz vah, yungh cihsaw aeu gijneix cungj biujyienh okdaeuj.”

(3)