Miz ngoenz he, gwn haeuxngaiz le, mbwn raemhcupcup, goengda yousim naeuz: “Lwgraz lij youq ndaw reih, danghnaeuz mbouj sou, doek- fwn le, lwgraz couh hwnjmwt lo.” Daxmeh bekbek fwngz naeuz: “Gyoengq lwgnyez, gungqsou hix miz seiq liengx rengz, vunz lai rengz hung, daihgya cungj bae bang sou lwgraz ba.” Dou caengz guh gvaq hong nazreih haenx angqvauvau diuq hwnjdaeuj.

Daeujdaengz henz reih, dou cungj baen ndaej fag liemz he. Daihgya cung haeuj ndaw reih bae, hihi haha gvej goraz. Gou buet daengz goraz youh hung youh sang he, yaengx fagliemz couh raemj roengz- bae, goraz bi geij mbat, youh ndwn soh lo. Gou cijndei dawz fagliemz lumj dawz faggawq nei gawq goraz, gawq haujlai nanz cij gawq raek. Gou cingq daekeiq, nyeux gyaeuj baez yawj, daxmeh gaenq gvej ndaej bog he lo. Caiq yawj, dahcej hix gvej ndaej bog iq he. Gou gip ndaej yaek daej bae, ganjgaenj bae cam daxmeh baenzlawz gvej. Daxmeh naeuz: “Gvej goraz seiz, song ga loq aj ok, mienx deng gvej daengz ga, bakliemz loq ngeng daxhwnj, yienghneix cij gvej ndaej vaiq. Mbouj gangj fuengfap hengzmanz gvej, sai rengz youh nguh hong bw.” Gou naj nding dwk ngaekngaek gyaeuj, hag gij fuengfap daxmeh, caen dwg yungzheih gvej haujlai. Seizhaenx, gou yawjraen goraz iq he, couh yungh rengz ciemz, siengj mbouj daengz goraz deng gou lienz rag ciemz hwnj, gou lienz doiqlaeng geij yamq cij ndwn ndaej maenh. Gou nyeux gyaeuj yawj, dai lo, goek goraz lumj fagmid nei baizlied, danghnaeuz laemx roengz, caekhaex gou couh yaek hai va lo!

Mbwn yied daeuj yied raemh, gwnzmbwn fwj ndaemndwtndwt, doek fwn iq lo. Dou cungj mbouj caiq guh’angq, ngaem gyaeuj guh hong. Hainduj dawz baenz bog lwgraz cang hwnj dohlahgih bae lo. Vunzhung baez ndeu couh gwed ndaej geij bog lwgraz, dou lwgnyez gwed mbouj ndaej, couh song boux ram. Goengda naeu:“Siengj mbouj daengz ngoenz- neix raeuz gvej ndaej baenzlai lwgraz, daihgya sinhoj lo! Daengz seiz moix vunz ciengj bingz youzlwgraz he!” Yienznaeuz dou gig naet, hoeng daihgya mwngz yawjyawj gou, gou yawjyawj mwngz, cungj riu lo. Laxlawz gwnz naj、gwnz fwngz daihgya cungj dwg uq namhndaem, cungj bienqbaenz boux vunzndaem lo!

Ngoenz neix yienznaeuz gig naet, hoeng ndawsim gou gig angq, aenvih gou cimz daengz le gij feihdauh guhhong angqyangz.

(roek nienzgaep Cau Gyahhau)