“Bouxwnq ngoenzneix bae hwnj- dangz, gou daengz Siengcouh daeuj eu fwen, Yizcouh cejnuengx miz ceiqheiq, aeu daenj mauhvuengz hwnj daihhag.” Youq gwnz daiz bineix sam nyied sam gaiq daihbet Guengjsae fwenvuengz doxdax(Siengcouh) fwen- vuengz doxdax, miz song cejnuengx Bouxcuengh Vangz Yungznaz、 Vangz Yungzhoz daj mbanjranz Liuz Sanhcej Yizcouh Si Gingyenj Cin Lingjbingz Cunh Mbanjdunghyin daeuj haenx gig hawj vunz cimyawj, bisoq songde faenbied dwg 14 bi caeuq 12 bi, gyoengqde mboujdan gamj caeuq fwenvuengz Guengjsae Cinz Vangingj daengj vunz doiq fwen, lij gamj caeuq boux gauhcunghswngh Majsanh Yen Ciengj Cwngz doiq fwen dem, doeklaeng ginggvaq bingzveij bingz baenz “cib daih canghfwen Guengjsae”. Bisoq iqetet couh ndaej aen cwngheuh ndei neix, bouxyawj cungj naeuz: “Mbanjranz Liuz Sanhcej miz vunzlaeng lo”, canghfwen Banh Biswng caeuq songde doiq fwen seiz haenhdanq: “Song dah cejnuengx caen coengmingz, nienzgeij oiqoiq ciengq ndei dingq, eu fwen ndei gvaq Liuz Sanhcej, mbeidamj mauhgvaq Muz Gveiyingh.”

Vangz Yungznaz bineix 14 bi, youq Yizcouh Si Minzcuz Cunghyoz doegsaw, dahnuengx 12 bi youq Gingyenj Cin Lingjbingz Siujyoz doegsaw, daxboh songde Vangz Yozcauh dwg canghfwen Bouxcuengh okmingz ndeu, ndaej aen cwngheuh ndei fwenvuengz Guengjsae gvaq. Daj songde roxsoq hainduj, ndaejdaengz daxboh yingjyangj, song cejnuengx ciengzseiz yungh yingjdezgih cuengq deb Fwencuengh, yawj densi, gaem vahdoengz riengz hag eu fwen, daxboh raen songde gyaez eu fwen, couh vuenheij son songde hag eu fwen, baeznaengz daxboh songde ok rog camgya doxdax eu fwen seiz, cungj daiq songde bae riengz, hawj songde hagsib hagsib. Song cejnuengx bingzseiz cawz hagsib guh cozyez le, couhdwg eu fwen, songde eu hot fwen baenz neix gvaq: “Gyoengqdou song boux siujhagseng, minzcuz vwnzva gyaez swnjcienz, cawz hagsib le lij eu fwen, yungh fwen cienz cingz cienz youxngeih.” Song cejnuengx gyaez eu fwen, daxboh couh ciengzseiz cawx sawfwen caeuq debfwen daeuj hawj songde hag, lij sonyinx gij ciengqfap caeuq bang gaijcingq gij diuh dem, daxboh iugouz songde aeu swz fwen dep bakgangj、 lai doengsug, lij aeu yungh beijlumj dem. Ndaejdaengz daxboh sonyinx songde hag baenz gig vaiq, bi 2012 couh hwnjdaiz camgya Yizcouh Si eu fwen doxdax. Mwh ndang daenj buhvaq Bouxcuengh hwnjdaiz yungh gij sing lwgnyez ndeidingq eu fwen, yienhciengz bouxyawj cungj yawj dwk da cungj mbouj yaep, ndaejdaengz gyoengq bingzveij caeuq bouxyawj haenhndei. Gyoengqvunz haenh songde baenz Liuz Sanhcej iqetet, foenfoen gujli songde ndeindei doegsaw, doengzseiz roengzsim hag ndei Fwencuengh raeuz.

Daxboh songde lij ciengzseiz yungh seiz songde mbouj hwnjdangz, daiq songde bae camgya fwenhoih doxdax youz Yizcouh Si、 yanghcin banh haenx, song cejnuengx neix hix miz haujlai baez aeundaej daih daeuz. Bi 2016 Siengcouh Yen banh fwenvuengz Guengjsae doxdax seiz, daxboh songde cienmonz dinghguh song dauq buhvaq Bouxcuengh hawj songde. Songde baez hwnjdaiz eu fwen, yienhciengz bouxyawj hoengh- hwd lai hwnjdaeuj, daihgya cungj ceng yawj songde baenzlawz eu fwen, dingq sing lwgnyez ndeidingq neix eu Fwencuengh. Ngoenzhaenx songde ciuq gij iugouz bouxyawj caeuq canghfwen ciengq le seiq lwnz, caeuq song boux fwenvuengz Guengjsae Cinz Yezgveiz、 Cinz Vangingj guh doxdax. Cinz Vangingj baenzneix ciengq:“Byaleix iqiq gyaep iqiq, nuengxsau iqiq caen coengmingz, cejsam dawz fwen cienz hawj mwngz, hawj mwngz daeuj guh boux- swnjcienz.” Song cejnuengx hoiz:“Yawjraen suijbingz mwngz haemq daemq, naeuz dwg fwenvuengz gou vaegngeiz, gwnz gyaeuj aen mauh fwenvuengz neix, gou yawj caeg ndaej bouxwnq daeuj.” Aenvih songde eu ndaej ndei, gamj caeuq seiq boux canghfwen、 fwenvuengz doiq fwen、 doxdax, doeklaeng ndaej bingzveij bingz baenz “cib daih canghfwen Guengjsae”. Canghfwen Cinz Yezgveiz yienghneix ciengq songde: “Song dah nuengxiq faj bak gvai, eu fwen eu daengz Siengcouh daeuj, gaej gangj riengz gou hag dungxcaiz, gyoengqsou dungxcaiz beij gou gvai.” Song cejnuengx ciengq hoiz: “Gyoengqdou song dah lwgnyez iq, eu fwen hwnjdaeuj miz suijbingz, caiq gvaq song bi mwngz daeuj yawj, suijbingz ndei gvaq Sung Cujyingh.” Dang caezgya cungj haenhdanq songde eu ndaej ndei, ndaej ciengj lai seiz, song cejnuengx ciengq: “Gyoengqsou gaej aeu gangj dou gvai, gizsaed gyoengqdou hix gig ngawz, gaujsi ciengzseiz ndaej aen lingz, lauxsae ndaq dou dwg mahuk.”

Ciuq daxboh songde naeuz, songde bineix 5 nyied camgya fwenhoih doxdax youz Gveicouh Swngj banh haenx ndaej daihsam mingz, song cejnuengx eu fwen eu ok rog gih, lij ndaej mingzdaeuz dem, mbanjranz Liuz Sanhcej Guengjsae raeuz caen miz vunz swnjcienz lo!