Cinz Gozmingz boux vunzlaux ndaej 83 bi neix dwg Gveilinz Si Siufungh Gih Liginh Segih boux okmingz ndeu, de laebdaeb gag caux gag eu fwen, daengz seizneix soqmoeg gaenq mauhgvaq 29.2 fanh hot, ndaej “ceiq lai Giznizswh”——bouxvunz eu fwen(gag caux fwen) soqmoeg ceiq lai Sanghaij Giznizswh fat haenx.

Duiyouh daj dieg guhhong vwnzva 43 bi haenx doeklaeng, Cinz Gozmingz roengzsim guh saehnieb goeng’ik, dawz ok 10 fanh maenz coih fwen yisuzgvanj, caemhcaiq youq ndaw gvanj、 ndaw ranz、 segih、 hag- dangz caeuq danhvei dieg guenjleix hailaeb goqdangz, son’gyauq boux- gyaez fwen gak hangz gak nieb caux fwen caeuq eu fwen fanh lai vunzbaez mbouj aeu cienz, hawj buek “boux ak fwen” ndeu ndaej okmingz. Bi’gvaq geiqniemh hoenx ciengq ndaejhingz 70 hopbi yawjbing hozdung gietsat ngoenz daihngeih, de baenz hwnz daengz rongh ganj sij 100 lai hot fwen fanjyingj gij cingzcik daj seiz hoenx ciengq hojnanz daengz gaijgwz hailangh aeundaej haenx, boiq hwnj 80 fuk doz de soucomz ndaej haenx, guhbaenz canjbanj senhconz fwen “hoenx ciengq ndaejhingz 70 hopbi 80 banj” raez daengz 20 mij, yungh ndwen seizgan ndeu, daiq gij vaiqbanj de daengz 20 lai aen segih cunzyienj mbouj aeu cienz, sou ndaej yaugoj son’gyauq haemq ndei.

Cinz Gozmingz 3 bi hainduj hag eu fwen, itcig daengz hwnj siujyoz、 cunghyoz caiq daengz camgya guhhong, caengz duenh gvaq. De naeuz, gij saeh ciuhvunz de ceiq miznaj couhdwg sam baez eu fwen dwk bae Baekging: Baez daih’it dwg bi 1960 ndwen 6, de camgya daengx guek vwnzgyau ginzyinghvei youq Yinzminz Daveidangz hai haenx; baez daihngeih dwg bi 1979 ndwen 9 daengz ndwen 10, camgya canghfwen、 canghsei ndawbiengz siujsoq minzcuz daengx guek, song baez ndaejdaengz bouxdaeuz guekgya caeuq dangj ciepraen; baez daihsam dwg bi 1982 ndwen 12, 300 hot fwen de gag caux haenx, ndaejdaengz Guekgya Laj- mbanj Sawdoeg Cuzbanjse souloeg, bien oksaw 《Fwen Bouxguhnaz Hag Saw》, ndaej daengx guek ngeih- daengjciengj, ndaej iucingj bae Baekging lingx ciengj. Bonj saw neix soq fathengz sang daengz 30 fanh cek, vih hong saujmangz daengx guek guh ok gungyen hungloet.

“Fwen de va nding mbaw faex heu, sengmingh caeuq fwen doxcaemh goek, gou dwg go faex eu fwen ndeu, nyienh ging fwn rumz nyienh goemq yaem.” Bi’gvaq, Cinz Gozmingz ndaej Giznizswh doeklaeng, cien lai boux lwgsae de yungh gak cungj fuengsik cukhoh de, caemhcaiq gienq de ndeindei yietnaiq, hoeng de yungh hot fwen ndeu doi gij eiqsei ndei caezgya. De naeuz:“Gij saeh ciuhvunz ceiq vuenyungz dwg dawz cihsiz cienz hawj vunz yaek yungh haenx. Gou dwg geq cix mbouj nduk, doi le mbouj yietnaiq, sonsaw ganqvunz, angqgvaq ndwenngoenz.”