Haemhlwenz gou loq raen gig dwglau, loq raen gou youq gwnz gai gvangqlangh mbouj miz saek boux vunz haenx ra daxboh daxmeh、daxgoeng daxbuz, gou gip ndaej yaek daej lo……

Sawqmwh, gou yawj coh gwnzmbwn, raen digiuz couh youq gwnz gyaeuj gou, gou siengj: “Nanzdauh gou dwg youq gwnz lingh aen singhgiuz ha?” Gou byaij bae coh diuz dah’iq he. Byaij dwk byaij dwk, gwnzmbwn deng mokuq gyuemluemz lo, mokuq saekndaek dwk gou ae mbouj dingz. Gou loh gvaq benq ndoengfaex he seiz, yawjraen raemjfaex gunghyinz cingq gaem dienhgawq gawq gofaexhung. Daxgoeng faexhung indot dwk naeuz:“Sou gaej caiq gawq lo, mbouj yawjraen gou daengx ndang cungj dwg lwed ha?” Gou byaij daengz henz dah seiz, yawjraen miz vunz mboujduenh dauj nyapnyaj youq henz dah. Daegnuengx dah’iq hemq naeuz:“Gaej caiq doicuengq nyap- nyaj youq henz ndang gou lo, gou yaek deng uqlah lo!” Dingqnyi vah daxgoeng gofaex caeuq daegnuengx dah’iq, gou nyaenx mbouj ndaej gag gangj gag naeuz: “Daj seizneix hwnj, gou itdingh yaek baujhoh vanzging, itdingh mbouj hawj sou caiq yiengh- neix hojsouh indot lo.” Mwhde, raq doxgaiq he daj haeuj ndaw ndang gou, gou sikhaek bienqbaenz boux vanzbauj ciuvunz ndang daenj buhdiet、fwngz dawz aensupfaenx mbouj miz vunz ak gvaq he, yaepyet couh sup gij mokuq bae mbouj lw saek di, cingleix sojmiz nyapnyaj bae, laengz bouxraemjfaex mbouj hawj gyoengqde raemj faex……. Gwnzmbwn sikhaek seuq ndaej lumj gingq nei rongh, hoengheiq singjsien, gizgiz cungj dwg va hom roeg ciuz. Mwhde, gou yawjraen bouxboux vunz cungj doiq gou riu, gij riu gyoengqde lumj daengngoenz nei ronghmyag.

Sawqmwh, gou dingqnyi dax- meh heuh gou: “Yingz Cwngz, hwnq lo!” Gou menhmenh hai da, yawjraen daxmeh cingq raghai yiemzcueng, geu ndit he saj youq gwnz mbonq gou raeujrub, lij ndei, aen digiuz gou gwndaenj haenx lij miz ndit!

(seiq nienzgaep Yingz Cwngz)