12 nyied 10 hauh, Ginhsiu Yauzcuz Swciyen Dacangh Yangh Swnh’eiq Lwgmak Hozcozse cingqsik hainieb, 150 hoh boux- ndaemmak yaek youq bakdou bonjfaenh “bienqndang”guh canjyez gunghyinz.

Ciuq cam rox, Ginhsiu Swnh’eiq Lwgmak Hozcozse youq 2016 nienz 1 nyied laebbaenz, itgungh ok cienz 200 lai fanh maenz, aen cangj ciemq dieg menciz 3500 lai bingzfanghmij, faen guh dieg cuengq mak、gisuz beizyin gihdi caeuq giz doxgaiq boiqsoengq cungsim sam giz dieg. Seizneix aen yangh neix miz 6 aen cunh、29 aen mbanj 156 hoh bouxndaemmak gyahaeuj aen hozcozse neix, vunz 626 boux. Dwg aen nungzminz conhyez hozcoz ginghci cujciz comz ndaem mak、gai mak caeuq gisuz moq doigvangq daengj he.

Dangqnaj aen hozcozse neix gaenq laebbaenz “sam aen can”(gisuz fuzvu、doxgaiq gunghawj、mak gaicawx), yungh swnghcanj ginghyingz haj doengjit(doengjit ndaem、doengjit cawx、doengjit gai、doengjit gisuz beizyin、doengjit siengbiu binjbaiz) gij “haj vih it daej”aen ginghyingz mozsi neix.

(Cau Binhningz/赵宾宁)