Ngoenzneix ceng di hwk dai gou lo——dahnuengx mbouj raen lo!

Ninzngaiz ndiu gvaqdaeuj, dah- nuengx mbouj raen lo. Gwnz mbonq fandenz baeb ndaej cingjcingj caez- caez, gouh haizliengz iq de lij baij cingq youq naj mbonq. Hoeng dahnuengx bae gizlawz lone? Youq ndawhongh, mbouj raen dahnuengx; cam ranznden, hix mbouj miz vunz raen; ra doh gij lwgnyez ciengz caeuq dahnuengx guhcaemz haenx, hix mbouj raen! Gou gipmuengz buet daengz ran daxdaiq liz ranz gou mbouj gyae haenx bae. Daxdaiq mbouj raen dahnuengx, youh gipgip muengz- muengz caeuq gou buet dauqma. Ngamq haeuj ranz, cij raen dahnuengx angqvauvau aj song gen coemj coh daxdaiq. Gou baez raen dahnuengx, dungx heiq he mbouj rox daj gizlawz daeuj, baez rag dahnuengx gvaqdaeuj: “Mwngz bae gizlawz loha?” Siengj mbouj daengz daiq yungh rengz, rag dwk dahnuengx laemx youq gwnz dieg lo, dahnuengx vei ndaej “va” daej lo. Dahnuengx baez daej, gou boux guh dahcej neix sim’unq lo. Gou sing iq gienq de:“Gaej daej lo, dwg dahcej loek lo! Haxbaenh mwngz bae gizlawz ha?” Dahnuengx raen gou hozswnh haujlai lo, hix mbouj daej lo, de naeuz:“Gou gizlawz cungj mbouj bae, itcig youq ndaw rug daxboh yawj saw. Gou ndiu seiz, mwngz lij ninzndaek, gou couh mbouj heuh mwngz lo.” Aeya, laxlawz dwg gou loek gvaiq dahnuengx lo, gou sawqmwh gamjdaengz gig mbouj gvaqeiq. Yawjraen dahnuengx mbouj daenj haiz, gou youh naeuz de: “Son mwngz geijlai baez lo, aeu gyaez seuq di, mwngz baenzlawz youh mbouj daenj……”Caengz caj gou gangj sat, dahnuengx couh naeuz: “Neix cungj dwg lauxsae son ha!” “Ha?” Gou gig geizheih. Dahnuengx yienhndaej gig daekeiq, ciengq diuz golwgnyez ngamq hag rox haenx:“Lwgnyez gvai, cingq ninzngaiz, youwzyenz dinghsisi. Duzmeuzraiz, rox dauhleix, yaemj din yaemj nyauj buet gwnzdeih; din mbaeumbi, mbouj ok heiq, lwgnyez bouxboux ninz ndaej ndei.” Ciepdwk de saenzmaed dwk lwnh gou:“Mwh dou ninzngaiz, lauxsae byaij loh cungj gig mbaeu, lau cauz ndiu dou.” Seizneix gou cij fwt singj gvaqdaeuj: Dahnuengx vihliux hawj gou ndeindei ninz, cij mbouj heuh gou, cij mbouj daenj haiz, laeglemx byaij okbae.

Dahnuengx geijlai roxsoq ha! Gou moenghmangh yawj dwk de, lumjbaenz ngoenzneix cij rox de nei.

(roek nienzgaep Cwnz Binghswh)