Dahsau seizcin menhmenh byaij haeuj hagdangz dou, hagdangz dou couh lumj aen suenva nei gyaeundei. Dahsau seizcin byaij daengz diegnywj, go’nywj daj ndaw namh laeglemx ndonj gyaeuj okdaeuj, go’nywj maj ndaej oiqetet heuswdswd. Rumzcin cififi, go’nywj binengneng.

Ndaw hagdangz dou miz aen gyauyozlouz haj caengz sang ndeu, moix caengz miz cib aen gyausiz. Baihrog daz gij saekhenj ndeiyawj raixcaix. Daengngoenz ciuq roengzdaeuj gig lwenqda. Gyauyozlouz baihnaj miz gomoegmienz ndeu, maj ndaej youh hung youh sang, gofaex caengz maj mbawfaex, nyefaex dauq hai rim dujva. Dujva lumjbaenz mwngz mbouj nyiengh gou, gou mbouj nyiengh mwngz, cungj lumj ganj nauhyied nei hai dwk. Gij va nding ndaej lumj feiz nei. Ndaw va daiq miz gij feih diemzsubsub, yinx baenz cien baenz fanh duzrwi daeuj gyaep, mbungqmbaj duz hung duz iq youq ndaw va mbin bae mbin dauq angq raixcaix.

Bingzbaiz gyauyozlouz dwg aen suzselouz he, hix miz haj caengz sang. Baihrog daz ndaej hausaksak, ndaw suzse gvangqlangh ronghsag. Naj louz miz go rungz hung ndeu. Gorungz maj ndaej heusausau mwncupcup, lumj aenliengj hung gang ok nei, mbawfaex doxdaeb doxdeb, laeuh ok gij ngaeuz daengngoenz baenz diemj baenz diemj. Gyoengq doengzhag gig maij youq laj gofaex dwk giuz、buet、 guh yahndoj、diuqcag......geijlai angq ha!

Hagdangz dou caen gyaeundei ha! Gou gyaez hagdangz dou.

(指导老师：韦梅花)