Gaenh bi neix daeuj, Cingsih Si netsaed gaem ndei siujsoq minzcuz hwngfat ngaenzcienz hanghmoeg hwnjguh, laebdaeb haeujlaeg doicaenh hong hwng gapgyaiq fouq beksingq hengzdoengh、 bangrex gyaeujvunz haemq noix siujsoq minzcuz hwngfat, cietsaed gaijgez gij hojnanz saedceij swnghcanj vunzlai gizdieg siujsoq minzcuz, cienzmienh bangrengz vut gungz gunggeng.

Ciuq cam rox, bineix aen si neix anbaiz siujsoq minzcuz hwngfat ngaenzcienz giekdaej sezsih hangh- moeg gungh 50 aen, gungh bued roengz 1882 fanh maenz ngaenz, faen 2 buekbaez guh hwnjguh. Dangqnaj buek daih’it hanghmoeg gaenq haihong, bued roengz 1616 fanh maenz ngaenz, anbaiz hanghmoeg 35 aen. Buek daihngeih bued roengz 266 fanh maenz ngaenz, hanghmoeg cingq saedhengz dajveh caeuq yawhsuenq, gujsuenq youq nienzdaej gonq haihong. Ciuq dungjcouz cingjhab sawjyungh siujsoq minzcuz hwngfat ngaenzcienz gungh- coz iugouz, giethab “cibsam haj” geizgan hong minzcuz cungdenj yinvu, hanghmoeg cujyau anbaiz gij mbanjgungzhoj caeuq mbanjguhyiengh minzcuz doxgiet, hwnjguh loihhingz dwg roenloh aenmbanj hwnjguh、 daemzraemx lohmieng dwk raemxnaz、 minzcuz vwnzva hozdungsiz、 daj- ndongj roenloh ndaw mbanj daengj aenmbanj giekdaej sezsih, gizdieg hwnjguh faenbouh youq daengx si 19 aen yanghcin 44 aen hingzcwngcunh.

Hanghmoeg hwnjguh baenz doeklaeng, yaek gaijgez gij gungzhoj vwndiz daegbied gungzhoj siujsoq minzcuz diegcomzyouq、 gizdieg gap- gyaiq、 gizdieg minzcuz gyaeujvunz haemq noix caeuq aenmbanj siujsoq minzcuz miz daegsaek aen si neix, vih hong vut gungz gunggeng aen si neix gya veh mbat bit ronghsag he.

(Yangz Boz/杨 博)