Duzmwi gaemdawz bonj saw he, itmienh byaij itmienh yawj. Sawqmwh, duz lingz he daj gwnz faex diuq roengzdaeuj, ciengj bonj saw duzmwi gaem ndaw fwngz haenx bae le, youh riengjret diuq hwnj gwnz faex bae lo.

“Duzlingz, vaiq boiz saw hawj gou!” Duzmwi gip lo.

“《Geiq Lwglujlaj Ndaw Singz- suyoz Ginglig Yungyiemj》, bonj saw neix itdingh gig ndei yawj, ciq hawj gou yawj ba!” Duzlingz aengjsaeng dwk naeuz.

“Gou yawj sat le caiq ciq hawj mwngz ndaej lwi?” Duzmwi hoj- lienz dwk gouz naeuz.

“Mwngz haengjdingh gyaez suyoz, ok diuz daez he hawj mwngz, dap doiq le dawz saw boiz hawj mwngz, mboujne, ciq gou yawj sat le caiq boiz hawj mwngz.” Duzlingz riu naeuz.

“Yienghneix ndei ba!” Duz- mwi fouznaih dwk naeuz.

Duzlingz naeuz:“Miz sam cungj saw, gyaqcienz baenbied dwg 15 maenz、20 maenz caeuq 23 maenz, cungj gyaqcienz dwg 150 maenz. Sam cungj saw neix gak miz geijlai bonj?”

Duzmwi siengj yaep ndeu, naeuz: “Gij saw 15 maenz caeuq 20 maenz gak miz bonj he, saw 23 maenz miz 5 bonj.”

“Va, suenq ndaej caen vaiq ha! Mwngz dwg baenzlawz suenq ha?” Duzlingz haenh naeuz.

Duzmwi naeuz:“Bouh ceiq youqgaenj dwg suenq bonjsaw 23 maenz miz geijlai bonj. Aenvih cungj gyaqcienz dwg 150 maenz, soq govei dwg 0. Soq 23 maenz haemq daegbied, cungj saw neix bonj soq gwnz govei dwg 5 roxnaeuz 0, cij miz gojnaengz ndaej daengz cungj soq 150 maenz. Danghnaeuz bonjsaw 23 maenz miz 10 bonj, couh dwg 23×10=230 (bonj), lai gvaq 150 maenz lo. Ndigah bonjsaw 23 maenz itdingh dwg 5 bonj. 5×23=115 (maenz), 150-115=35 (maenz). Gig yungzheih couh suenq ok bonjsaw 15 maenz caeuq bonjsaw 20 maenz gak dwg bonj he.”

“Mwngz caen coengmingz, boiz saw hawj mwngz gonq ba!” Duzlingz daj gwnz faex diuq roengzdaeuj, dawz saw boiz hawj duzmwi lo. (Duz Sauyoz)