Mboengqneix, cek saw iq《300 Coenz Vahcuengh Giekdaej Dox- gangj》youz Namzningz Si Minzyijveij lienzhab Guengjsae Namzningz Si Yungjcangh Youjhan Cienzboq Gunghswh bien haenx guhsat le, baez daeuz yaenq cungjsoq 3500 cek, ndawde faen hawj 12 aen yienh gih gak 200 cek, giensoengq hawj Guengjsae Swhfan Yozyen Codaengj Gyauyuz Yozyen 300 cek.

Bineix 6 nyied co hainduj guh hong bien cek saw iq《300 Coenz Vahcuengh Giekdaej Doxgangj》, 8 nyied guhsat cogauj, 9 nyied daej dinghgauj. Cek saw neix youz Namzningz Si Minzyijveij cawjbien, Cungguek Minzcuz Yijvwnz Fanh- yizgiz ngeih gaep hoizsaemj、 gyausou Gvanh Swgingh sij ok cogauj, Dwng Yungjningz gyausou、 Yangz Lanzgvei hoizsaemj saemjdoeg cogauj; Lingz Hinghningz hoizsaemj、 Cinz Siengz- couh hoizsaemj nyinhcaen saemjcaz daengx cek saw, caemhcaiq doigawj yaenq okbanj.

Cek saw neix cujyau ciuq gij cingzgvang saedcaeq Bouxcuengh doxgangj vah bien baenz, yungh Sawcuengh、 gozci yinhbyauh、 Saw- gun doiqciuq sij, neiyungz doengsug ngaih rox, gig miz gij yinxdaeuz saedceij. Cek saw neix hab boux ngamq hag Sawcuengh yungh, muzdiz dwg hawj bouxdoeg yungh di seizgan he, couh ndaej yungh cungj fuengsik angqyangz neix, hag rox yungh Vahcuengh doxgangj, daezsang gij naengzlig yungh Vahcuengh doxgyau. Daengx cek saw faen baenz dox- dongx、 baiqraen、 hagsib、 guhhong daengj gungh 20 bien.

Cek saw neix mboujdan ndaej hawj vunzlai gak cuz rimhoz, yungh di seizgan he couh hag rox yungh Vahcuengh doxgangj, gyalai gak minzcuz doxgyau doxyungz, hix doiq hong doihengz Sawcuengh aen si neix miz gaenxmaenx coicaenh cozyung.

(Veiz Yinjsenz/韦尹璇)