Bonjbauq siusik (gicej Liengz Cingz) 11 nyied 1 hauh banhaet, bi 2016 aen banbeizyin fazgvanh Cuengh Gun song saw vah daengx guek youz Swcigih Gaugaep Yinzminz Fazyen banh haenx youq Guengjsae Fazgvanh Yozyen haiban. Swcigih Gaugaep Yinzminz Fazyen fuyen- cangj、 Guengjsae Fazgvanh Yozyen yencangj Dai Hungzbingh, Swcigih Minzyijveij fucujyin Veih Yungj- hungz caeuq Swcigih Gaugaep Yinzminz Fazyen、 Swcigih Minz- yijveij、Guengjsae Fazgvanh Yozyen mbangj bouxfucwz camgya haiban yizsi.

Dai Hungzbingh guh le haiban dungyenz. De naeuz, aeueiq caeuq baujcang gij gienzleih siujsoq minzcuz yungh saw vah minzcuz bonjfaenh, mboujdan dwg hangh gihbwnj cwngcwz guekgya he, youh dwg gij aeu yungh gyagiengz minzcuz doxgiet, gyagiengz hong beizyin fazgvanh minz Gun song saw vah yiyi gig youqgaenj. Muengh gyoengq yozyenz dingh ndei hagsib muzdiz, caenh’itbouh dem’ak roxyiuj minz- cuz cwngcwz guek raeuz, caenh- itbouh daezsang gij naengzlig yungh Sawcuengh Vahcuengh, vih engq ndei guh ndei hong saemjbuenq dwkroengz giekdaej maenhndei.

Veih Yungjhungz cukhoh ban- beizyin swnhleih haiban. De naeuz, gaenh geij bi daeuj, dangj caeuq guekgya hopheux “seiq aen cienz- mienh” canloz baijbouh, gyavaiq cienzmienh ciuq fap guenjleix guekgya、 hwnjguh fazci Cungguek cincwngz. Hoeng aenvih gak cungj yienzaen, seizneix fazgvanh dieg minzcuz cungj rox saw vah guekgya doeng’yungh caeuq rox saw vah siujsoq minzcuz dangdieg lij giepnoix. Bi’gvaq banh baenz gaiq daeuz banbeizyin fazgvanh Cuengh Gun song saw vah daengx guek haenx, vih sengj gaep fazyen caeuq bumwnz guhhong saw vah minzcuz doxgap haiguh beizyin dwkroengz giekdaej maenhndei; bineix Swcigih Minz- yijveij yaek laebdaeb guh ndei caeuq gyamaenh cungj doxgap boiqhab、 doengzcaez doicaenh neix; gvaqlaeng, bumwnz guhhong saw vah minzcuz lij yaek gaenxmaenx fatok gij ciznwngz cozyung bonjfaenh, yungh banhfap mizyauq, gaenxmaenx boiqhab、 sonyinx、 haeujcoengh hong son’gyauq fazgvanh Cuengh Gun song saw vah.

Baez beizyin neix seizgan dwg 10 nyied 31 hauh daengz 11 nyied 20 hauh, gungh miz 36 boux gihcwngz fazgvanh dieg Bouxcuengh camgya beizyin, ndawde Guengjsae miz 32 boux, Yinznanz miz 4 boux

Haiban yizsi sat le, Veih Yungj- hungz daiqbiuj Swcigih Minzyijveij gien 《Sawcuengh Giekdaej》daengj buek Sawcuengh ndeu hawj Guengjsae Fazgvanh Yozyen, hawj yozyenz guh sawsonhag beizyin caeuq sawcamgauj, vanzlij aeu 《Gij Cingzgvang Vahgangj Minzcuz Guengjsae Caeuq Hong Beizyin Fazgvanh Minz Gun Son Saw Vah》guh daez, hwnj le dangzgoq daih’it baez beizyin neix.