Vih ndeindei sawjyungh、 bauj- hoh caeuq doihengz hong Vahcuengh Sawcuengh, Vanzgyangh Mauznanzcuz Swciyen Minzyijgiz yungh song aen banhfap gaenxmaenx cauhmoq, hawj hong doihengz ndaej miz bouhloh guh.

It dwg gyagiengz hong Sawcuengh haeuj hagdangz. Gaenh bi neix daeuj, aen giz neix boiqhab gyauyuz cawjguenj bumwnz guh ndei hong guenjleix sonhag Cuengh Gun song saw vah. Cujciz mizgven vunz ciuq guhhong cizcwz caeuq dajveh, ciengz- seiz daengz Sawcuengh sawqdiemj hagdangz saeddeih cazyawj, roxyiuj gij soqmoeg hagseng Sawcuengh sawq- diemj hagdangz, dangzgoq Cuengh Gun song saw vah baenzlawz laeb caeuq lauxsae boiqbwh nem baenzlawz haiguh daengj cingzgvang, gyagiengz gyamaenh Sawcuengh haeuj hagdangz aen yienh neix.

Ngeih dwg gyagiengz guh hong doihengz Sawcuengh. Aen giz neix cujyau gaem ndei hong gihgvanh swyez danhvei baiz fapdingh, baizroen、 baizceijroen daengj yungh Cuengh Gun song cungj saw sij. Cujciz haiguh hong guenjleix haedyawj、 gveihfan hingz- cwng swyez danhvei baiz fapdingh yungh Cuengh Gun song cungj saw. Seizneix, aen yienh niex ndaw singz hingzcwng danhvei baiz fapdingh yungh Cuengh Gun song cungj saw sij danhvei fapdingh mingzcoh miz 252 gaiq, gaenq venj baiz miz 247 gaiq, ciemq wnggai venj baiz soqmoeg 98%. Ndaw singz baizceijroen hix gihbwnj yungh Cuengh Gun song cungj saw.

Doenggvaq caux ok heiqfaenh, gyagiengz doigvangq gvaengxlaengx yungh Sawcuengh, daezsang gij yisiz gyoengqvunz yungh Vahcuengh Saw- cuengh, vih coglaeng hong vatcimh、 baujhoh caeuq swnjcienz saw vah siujsoq minzcuz dwkroengz giekdaej maenhndei.

(Danz Su’myauz/谭素苗)