武宣县桐岭镇新龙小学五（1）班 谭楠茜

Bet nyied cibhaj ngoenz haenx, gwn caeuz le, gou caeuq daxboh、daxmeh、dahcej、daegnuengx hwnj gwnz dingjlaeuz bae ngonzyawj ronghndwen. Ronghndwen caengz okdaeuj, ndaundeiq cix yied daeuj yied lai, mbouj dingz dwk doiq dou yaepda. Dahcej naeuz:“Ronghndwen caengz okdaeuj, raeuz sien guhcaemz ba.” Daegnuengx naeuz:“Raeuz daeuj beijbeij bouxlawz geq ndaej ndaundeiq lai.” Geq couh geq , dou sam cejnuengx caj daxmeh hemq “it ngeih sam” couh doengzseiz ngiengx gyaeuj yawj gwnz mbwn bae geq. Hoeng mbouj geq ndaej geijlai aen dou couh dava, geq mbouj roengzbae lo. Daxboh riu naeuz:“Lwg huk ha, ndaundeiq baenzneix lai, youh yubyab mbouj dingz, sou baenzlawz geq ndaej ne? Sou daeuj beijbeij bouxlawz rom ndaej swzyij lai, ndei mbouj ndei?” “Ndei!” Dou doengzsing han naeuz. Daxboh hainduj ok daez lo, dou cungj gaenrwz dingq.

“Cingj gangj ok gij swz byaujsi lai haenx.” Daxboh naeuz .

“Haujlai haujlai.” Daegnuengx ceng naeuz.

“Baenz cien baenz fanh.” Gou ciepdwk naeuz.

“Geq mbouj ndaej liux. ” Dahcej naeuz.

Daxboh ciepdwk ok daez: “Cingj gangj ok gij swz roxnaeuz gij vahgawq miuzsij ronghndwen haenx.”

“Luenzlulu.” Gou naeuz.

“Ronghsagsag.” Daegnuengx naeuz.

“Gungjgetget.” Dahcej naeuz.

“Ronghndwen lumj aen buenznyawh ndeu.”

……

Mwngz coenz gou coenz, dou doxcanj dwk gangj gij swz dou rox haenx, beij haujlai nanz hix beij mbouj ok boux lawz hingz.

Seizneix, ronghndwen daj geh fwj loh aennaj luenzlulu de okdaeuj lo, ronghndwen ronghsagsag ciuq dwk daihdeih. Haemhneix dou mboujdan ndaej ngonzyawj ronghndwen, lij ndaej gungjgu caeuq rom cihsiz, caen dwg youh angq youh mizyinx ha.

（指导老师： 黄黎芯）