武宣县桐岭镇新龙小学六（4）班 廖少峰

Aen haggeiz neix, lauxsae anbaiz gou caeuq fubanhcangj Banh Yilienz caemh daiz naengh. Banh Yilienz gig coengmingz, moix baez gaujsi cingzcik youq ndaw ban cungj baiz youq haj mingz baihnaj, de caeuq doengzhag gig doxhuz. Hoeng, mbouj rox vih gijmaz, gou cungj siengj miedmied gij vifung de. Ndigah, gou yungh faenjbit youq gwnz daiz veh diuz “sien sambet” he. Hw, gaiqgen de aeu siujsim, mboujne……

Baez ndeu, Banh Yilienz cingq nyinhcaen sij cozyez, gen de iet gvaq “sien sambet” lo. Haha! Gihvei daeuj lo! “Ba” gou yungh rengz moeb gvaqbae. Cij dingqnyi de “aeyo” sing ndeu, sikhaek dawz gen suk baema, cozyez deng sik vaih lo. “Mwngz vih gijmaz moeb vunz?” De sing daemq cam gou, de ndatheiq dwk naj cungj nding lo. “Baujvei lingjduj, moeb boux ciemqfamh!” Gou gig daekeiq dwk gangj. De deng gou gangj dwk haujlai nanz gangj mbouj ok vah, raemxda doekbyoegbyoeg roengzdaeuj. Gou engq daekeiq lo. Geij boux doengzhag caeuq gou daegbied ndei haenx, cungj guh najgveij coh gou.

Roengzdangz le, miz dah doengz- hag ndeu aeu gij saeh neix lwnh lauxsae nyi, mbouj yungh gangj gou deng bihbingz can ndeu. Gou gamjdaengz miz heiq mbouj rox fat youq gizlawz. Ngoenz daihngeih, gou youq baihgwnz “sienq sambet” nyumx le raemxmaeg ndaem, caemhcaiq lij youq henz yungh faenjbit sij hwnj “bouxlawz bungq deng, itlwd mbouj fucwz” geij cih neix.

Banh Yilienz daeuj lo, de ngoenzneix daenj geu buh saek hoengzmaeq ndeu. Gou caeg angq lo, youh miz cit heiq he yawj lo. Hwnjdangz seiz lauxsae gangj gijmaz gou cungj mbouj haeujsim dingq, itsim muengh gwnz buh Banh Yilienz hai duj va’ndaem ndeu. Hoeng, de ngoenzneix hengzdoengh daegbied siujsim. Gou nyapnyuk lo. “Liu Saufungh, mwngz daeuj dap aen vwndiz neix.” Mwhhaenx, lauxsae heuh aencoh gou. Gou gipgip muengz- muengz ndwn hwnjdaeuj, mbouj siuj- sim bungq deng diuz “sienq sambet” lo. Seizneix, genbuh saekhau gou yaenq miz diuz sienqndaem ndeu. Ai! Caen dwg gag guh gag souh ha.

Roengzdangz le, gou heiqfoed- foed duet geubuh ndek youq gwnz daiz, couh buet okbae guhcaemz lo. Dauqma baez yawj, yi, geubuh gwnz daiz baenzlawz mbouj raen ne? “Geubuh mwngz Banh Yilienz dawz bae lo.” Miz boux doengzhag he lwnh gou nyi. Ho, siengj dauq loengh gou? Gou Liu Saufungh dwg mbouj ndei nyex bw! Gou heiqfoedfoed cung okbae ra de. Youq henz suijlungzdouz, miz dah hagseng he cingq saeg geu buh he. Gou byaij hwnjbae baez yawj, dwg Banh Yilienz! Ndaw fwngz de saeg geu buh haenx cingq dwg buh gou. Ndaeng gou baez soemj, cienq ndang buetdeuz lo……

Seizneix, ndawsim gou cijmiz aen siengjfap ndeu: Sikhaek uet diuz “sienq sambet” gwnz daiz bae, uet diuz “sienq sambet” buqvaih cingz- ngeih doengzhag haenx bae, sik- haek……

(指导老师 廖金芳)