Ranz gou miz aen suen iq he, gou caeuq daxmeh aeu aen suen iq cingjleix ndei, ndaem le haujlai byaek, hoeng mbouj ndaem makyungz gou gyaez gwn haenx. Yienghneix, gou heuh daxmeh cawx miuz makyungz daeuj bouj ndaem.

Hainduj ndaem miuz makyungz lo, gou ciuq daxmeh gangj haenx, sien dawz namh gvak soiq, dawz gij rin gij rum ndaw namh vut bae, sawj namh bienq ndaej youh soeng youh unq; gaendwk youq ndaw namh gyaux di bwnh roengzbae, hoeng mbouj ndaej gyaux lai, danghnaeuz gyaux bwnh lai, gomiuz couh deng ndat dai.

Daxmeh naeuz, ndaem gomiuz seiz, mbouj ndaej ndaem daiq laeg, namh hoemq gvaq gwnz rag couh ndaej lo, vanzlij dawz namh hoemq sang di, yienghneix ndaej sawj vwnhdu namh daezsang vaiq di, baujcingq gomiuz haemqvaiq maj ok rag moq daeuj. Gou ciuq daxmeh gangj haenx, gig vaiq couh dawz miuz makyungz ndaem sat lo, yienzhaeuh rwed di raemx.

Yawj baenz coij baenz coij miuz makyungz heuoiq haenx, gou lumjbaenz yawjraen baenz aen baenz aen makyungz lumj daengloengz nei venj dwk, gou ngah dwk myaiz cungj rih okdaeuj lo.

(Cwngh Ginjcanh)