Gou daj iq daengz seizneix, rox haujlai vunz, hix gamjsouh daengz haujlai gij gyaez bouxwnq, couh lumj ndaundeiq gwnz mbwn, lumj naedsa gwnz dieg, geq hix geq mbouj liux. Hoeng, gij gyaez lauxsae gou ciengxlwenx geiq youq ndawsim, siengj lumz hix lumz mbouj bae. Gizsaed gij gyaez couhdwg youq henz ndang raeuz.

Lauxsae gou miz seiqcib lai bi lo, gig unqsunh, de bingzciengz gig gvensim ndangdaej hagseng. Aen haggeiz gonq, miz haemh ndeu vanjswsiz roengzdangz le, gou buet ma suzse, aenvih buet ndaej daiq vaiq deng laemx lo. Seizneix cingqngamj lauxsae yawjraen, de sikhaek buet gvaqdaeuj, rag gou hwnj. Hoeng, gou baenzlawz cungj ndwn mbouj maenh, lauxsae gaenjcieng dwk lumhlumh din gou, nanzgvaq dwk gangj:“Siuj- fungh ha, baezlaeng mbouj ndaej buet daiq vaiq lo. Din mwngz in mbouj in, gou aemq mwngz bae yihyen ba.”Gangj sat couh aemq gou hwnjdaeuj yiengq yihyen byaij bae. Byaij daengz buenqloh, sawqmwh doek fwnhung, dou aenvih byaij daiq gip, mbouj daiq liengj caeuq buhfwn. Seizneix lauxsae couh dawz buhrog duet roengzdaeuj, goemq youq gwnz gyaeuj gou. Gij loh gumzgumz gamxgamx, gig nanz byaij, hanh gap fwn daj gwnz naj lauxsae lae’byoegbyoeg roengzdaeuj. Yawjraen yienghneix gou doiq lauxsae gangj:“Lauxsae, cuengq gou roengz- daeuj, gou gag byaij ba.”“Mbouj ndaej mbouj ndaej, yienghneix aiq gyanaek gij in mwngz.” Lauxsae lienzmuengz gangj. Lauxsae couh yienghneix baez yamq baez yamq aemq gou bae daengz yihyen.

Lauxsae mboujdan gvensim ndangdaej gou, lij gvensim hagsib gou.Haenx dwg gou hwnj haj nienzgaep seiz, miz baez ndeu, gou sij cozyez seiz,miz aen cih ndeu gou mbouj geiq ndaej sij lo, gou siengj: Danghnaeuz dawz aen cih neix bouj hwnjbae, cozyez couh mbouj cingjcaez lo, couh yienghneix gyau ba, gangj mbouj dingh muenz gvaqbae ne. Gou dawz cozyez gyau hawj lauxsae. Yawj lauxsae gaij cozyez, aensim gou diuqbubbub, ndawsim maqmuengh lauxsae gaej fatyienh cih saw gou mbouj sij haenx. Sawqmwh, lauxsae dingz bit roengzdaeuj, “Gizneix baenzlawz doek cih saw ndeu?”Gou mbouj rox baenzlawz gangj, haujlai nanz cij daj gehheuj gangj ok geij cih:“Gou lumz lo.”Lauxsae gangj: “Lumz lo? Mwngz baenzlawz yiengh- neix lujlaj ne? Vaiq dawz bae gaij ndei.”Daj seizhaenx hwnj, gou moix baez sij cozyez cungj mbouj gamj lujlaj lo.

Neix couhdwg gij gyaez lauxsae gou , de couh youq henz ndang gou.

(指导老师 廖金芳)