Yungzsuij Myauzcuz Swciyen yungh lai cungj banhfap baujhoh caeuq hwngfat dinfwngz conzdungj siujsoq minzcuz, aeundaej cingzcik haemq ndei.

It dwg banh beizyin. Yen cwngfuj gak mizgven bumwnz doenggvaq gij fuengsik caeuq hezvei、 giyez lienzhab, gyalai beizyin dinfwngz minzcuz, cungdenj beizyin gij saekdiuh dap- boiq、 genj baengzsiuq、 cauhmoq leih- yungh daengj fuengmienh, daezsang gij suijbingz dinfwngz dajsiuq. Doengzseiz ciuq vunz bae son, gyalai beizyin lauxsouj dajsiuq bujdungh caeuq bouxgyaez dajsiuq, guhhung aendoih. Gaenh geij bi neix daeuj, aen yienh neix minzcunghgiz、 yinzsegiz、 fulenz daengj bumwnz gungh haiguh lauxsouj dajsiuq dinfwngz beizyin 21 geiz, 1050 vunzbaez, dajsiuq beizyin 29 geiz， 1550 vunzbaez.

Ngeih dwg laebcaez ndei gihdi. Laebbaenz le aen hezvei dinfwngz minzcuz mehmbwk, seizneix hezvei gaenq miz mehmbwk bouxdaiqdaeuz guh ndaej saeh、 rox guh saeh、 guh baenz saeh 204 boux, cauxlaeb dajsiuq、 nyumxromj daengj minzcuz dinfwngz fwngzguh giyez、 hozcozse 21 aen, banh gak cungj rauh iq dinfwngz beizyin 2000 vunzbaez, daiqdoengh fanh lai boux guh minzcuz dinfwngz canjnieb hwngfat. Yen minzcuz vwnzva bozvuzgvanj laebhwnj aen- cueng langhbaij guh goenhsoij ngaenz, hawj hekyouz caenndang daejniemh, roxyiuj gij ginggvaq baenzlawz guh goenhsoij ngaenz. Aeu gij dinfwngz fwngzguh gunghyibinj siujsoq minzcuz dawzhaeuj minzcuz vwnzva haeuj hagdangz sonhag neiyungz bae. 20 aen yanghcin laebbaenz vwnzva cauxeiq cin’iq, aeu conzdungj fwngzguh gunghyibinj caeuq doxgaiq vwnzva guh cauhmoq yenzgiu haifat, swnjcienz vwnzva bonjdieg.

Sam dwg ndei gai. Doenggvaq denswj sanghvu hwnjlaeb denswj siugai bingzdaiz, gya’gvangq roenloh siugai huq ranzdajsiuq. Youq gingjgih gaijgez diemqbouq, bangcoh de langh- baij、 siugai. Gaenxmaenx haeujcoengh camgya gak cungj hoihlanghbaij, aeu langhbaij ciep dinghdan.

(Cinz Cunghdwz/陈忠德 Moz Siujlenz/莫小莲)