Cingzcik ndwengauj fat roengz- daeuj lo, gou baez yawj, suyoz cij gauj ndaej 76 faen. Dai lo! Danghnaeuz daxmeh rox le, itdingh deng de ndaq lo. Siengj bae siengj dauq, gou doeklaeng siengj ok aen banhfap he: Hawj cejngeih ranznden bang gou ciemcih.

Ngoenzhaenx gwn haeuxcaeuz le, gou doiq daxmeh naeuz bae ranz cejngeih ciq bonj saw he, daxmeh doengzeiq lo. Raen cejngeih le, gou ganjgip naeuz:“Meh gou nyaengq lai, heuh mwngz bang gou youq gwnz sigenj sij yigen gyahcangj.” Cejngeih siengj cungj mbouj siengj couh dapwngq lo. Naeuz:“Meh mwngz baenzlawz sij ha?” “Docih lauxsae, muengh lauxsae yiemz iugouz boux hagseng neix.” Daxmeh gaxgonq ciem gij yigen haenx cungj dwg yienghneix, gou caeux couh boih sug lo. Cejngeih riengjret ciem ndei yiyen, gou angqvauvau baema lo. Doeklaeng lauxsae hix yawj mbouj ok gyaj ciemcih.

Gvaq mbouj geij nanz, lauxsae aeu gij daez ceiqgaenh gauj yungzheih guh loek haenx, youh cingjleix baenz mbaw sigenj he gauj baez he. Aenvih baezgonq gou muenz gvaqbae, mbouj nyinhcaen gaij daez loek ndaw sigenj, cingzcik baezneix beij baezgonq lij ca. Baezneix, lauxsae cigciep dwk dienhvah hawj daxmeh, heuh daxmeh daeuj hagdangz dangnaj gangj. Youq ndaw gangjvah, daxmeh rox gij cingzgvang ceiqgaenh gaujsi caeuq hagsib gou, swhyienz hix raen mbaw sigenj baezgonq cejngeih bang gou ciemcih haenx lo.

Ma daengz ranz, daxmeh fak aen caekhangx gou geij mbat, itmienh fak itmienh sim’in naeuz:“Mwngz boux lwgnyez neix, baenzlawz di ndeu cungj mbouj roxsaeh, mbouj ndeindei hagsib, lij gangjgyaj yaeuh vunz. Dou baenz ngoenz nyaengq bae nyaengq dauq yungzheih ha? Mbouj couhdwg muengh mwngz ndeindei doegsaw, daengzcog ndaej gag ciengx ndaej swhgeij……”

Yawj gij yiengh daxmeh siengsim neix, lumh aen caekhangx inmanh gou, gou caen ienqhoij ha. Cungj dwg gangjgyaj haih gou, gou baezlaeng caiq hix mbouj gangjgyaj lo!

(sam nienzgaep Dingh Hau)