Youq Bingzgoj Yen Haijsingz Yangh Hingzgiz Cunh mbanj Hingz- giz miz aen mboq he heuhguh mboqbyaj, aen mboq neix gig geizheih.

Aen gihvei dingjlingz ndeu, hawj gou bouxvunz gvaq buenq bak bi ndaej daengz bae ndaw Byayauz youz mbat ndeu.

Ngoenzhaenx, gou daiq song bouxmbauq daengz Haijsingz Yangh Hingzgiz Cunh guh gij hong baihrog, haetromh dou couh daengz Hingzgiz Cunh cunhveij lo.

Aen cunh neix cungj dwg bya rin, ndaw mbanj cungj dwg gyoengq Bouxyauz youq. Bouxvunz daeuj ciepdaih、bang dou guh hong haenx dwg cunhveij fucujyin, heuhguh Vuz Cunggez, aen ranz de couhdwg youq mbanj Hingzgiz. Aen cunhveijvei couh guh youq gwnz ngamhbya raeb mbanj Hingzgiz. Youq cunhveijvei doiqnaj ngeng miz vaengz raemx he lumj raengz youh lumj cingj, youq gwnz raemx fouz miz haujlai daeuzraez, yawj hwnjdaeuj dwghinj lai lo. Vuz Cunggez naeuz daengx mbanj cungj gwn raemx aen mboq neix. Gou baez dingq miz di mbouj rox baenzlawz dap lo, yawj gij doxgaiq fouz youq gwnz raemx, doeksaet dwk iet baez linx ndeu.

Riengzlaeng, gou doiq Vuz fucujyin naeuz:“Wnggai goemq aen mboq neix hwnjdaeuj, gij raemx neix cij cinghseuq di ne!” De naeuz:“Mbouj ndaej goemq.”

“Vih gijmaz?” Gou gamjdaengz gig geizheih couh cam.

“Gyoengq vunzgeq ndaw mbanj naeuz, mbouj ndaej goemq. Aenvih aen mboq neix doeng mbwn, dwg aen mboqbyaj ndeu, cijaeu baez byajraez, aen mboq raemx couh hwnj lo.” Vuz fucujyin dap naeuz.

Gou gig geizheih cam de:“Cij byajraez mbouj doek fwn raemx mboq neix hix hwnj ha?”

Vuz fucujyin naeuz:“Hix hwnj, hoeng hwnj ndaej menh, danghnaeuz youh byajraez youh doek fwn raemx couh hwnj ndaej engq vaiq lo, hwnj rim liux couh lae okrog daeuj, baiz daeuzraez okbae caez, gij raemx saw daengz raen daej, daj gwnz raemx daengz laj daej miz 6 mij lai laeg ne!”

Gou youh cam:“Danghnaeuz cij doek fwn mbouj byajraez ne?”

Vuz fucujyin naeuz:“Hix hwnj, hoeng hwnj ndaej ceiq menh, beij cij byajraez mbouj doek fwn vanzlij menh, couh lumj raemx ndaw mboq cij dwg gij raemxfwn, mbouj dwg daj conghmboq conh okdaeuj nei.”

Lajmbwn baenzlai hung, gij saeh maz geizheih cungj miz. Banhaemh dou lizhai mbanj Hingzgiz dauq ma lo, gou youq ndawsim laeglemx naemj: Ndaej ra aen gihvei ndeu, ceiq ndei dwg byajraez doek fwn seiz, caiq daengz gizneix yawjyawj aen mboq- byaj neix.