Gou iq seiz dingq gyoengq vunzlaux gangj, miz doiq lauxdoengz ndeu vunz ged, boux ndeu youq Mbanjvuengz, vunz heuh de Laux- vuengz, lingh boux youq Mbanjbuen, vunz heuh de Lauxbuen. Baeznaengz song boux haenx cungj ra gak cungj gak yiengh lijyouz daengz ranznden ciq doxgaiq, lumjnaeuz ciq geng youz ndeu roxnaeuz ciq di gyu he. Vunz ndaw mbanj cungj dwg vunz soh, lai baez ciq neix youh ciq haenx, couh rox gyoengqde dwg vunzged lo, mbouj miz saek boux caiq nyienh caeuq gyoengqde baedauq.

Miz ngoenz ndeu, Lauxbuen bae ranz Lauxvuengz guhhek, baez haeuj ranz couh naengh roengzdaeuj, ndatheiq dwk naeuz:“Lauxdoengz a, haemhlwenz gou caen boihseiz, gou bae dwk ndaej geij duz bya hung, genj song duz okdaeuj, aeu cag roix dwk venj youq gwnz gofaex bakdou, dajsuenq ngoenzneix soengq daeuj hawj mwngz, byawz rox deng duzmeuz gwn lo.” De doq gangj doq yaengx diuz cag hwnjdaeuj, “Mwngz yawj- yawj, couh lw diuz cag neix ndwi. Lauxdoengz, aen bak mwngz caen mbouj miz fuk, suenq lo, ngoenzlaeng gou caiq bae dwkbya, itdingh genj aeu song duz bya hung soengq daeuj hawj mwngz.”

Daengz banringz seiz, Lauxbuen roxnyinh dungxiek lo. De raen Lauxvuengz mbouj cawj haeux loengh byaek, couh daezsingj naeuz:“Aiyu, dan goq gangjvah, aen dungx iek lo.” Lauxvuengz dingq le ganjvaiq haeuj ndaw bakcauq bae loengh byaek.

Ngamq gvaq yaep he, Lauxbuen couh mup daengz baenz raq baenz raq heiq rang, rang dwk ndaeng yaek vang bae. De hemq naeuz:“Lauxdoengz, cungj dwg vunz ndawranz, genjdanh di couh ndaej lo.” Lauxvuengz han naeuz:“Mbouj loengh lai, cij yungh rangz cauj noh caeuq cawj dang daeuhfouh.”

Byaek hwnj daiz lo, moix boux cungj miz vanj dang ndeu. Lauxbuen yawj ndaw dang, mbouj raen miz saek di daeuhfouh. Lauxvuengz naeuz:“Haxbaenh duznou haeb gij daeuh- fouh, gou lau uq mbouj cuengq roengzbae lo.” Lauxbuen caiq yawj ndaw deb, ndawde cuengq geij gouh dawh. De siengj: Nanzdauh neix couhdwg rangz cauj noh? Lauxvuengz youh riu dwk cek naeuz:“Lauxdoengz, mwngz daeuj nguh lo, danghnaeuz mwngz dwg seizcin daeuj, couh ndaej gwn rangz oiq lo, seizneix rangz gaenq geq lo.” Lauxbuen dingq le mbouj ok sing, gaem diuz beuzgeng hwnjdaeuj, menhmenh gwn dang.

Daengngoenz yaek doek congh lo, Lauxbuen siengj baema ranz. Ngamq yaek ok bakdou, mbwn sawqmwh doek fwn raq. Lauxbuen naeuz:“Laux- doengz, ciq aen liengj mwngz hawj gou gang baema ba.” Lauxvuengz yienznaeuz mbouj cingznyienh ciq hawj de, hoeng youh lau de dauq haeuj ranz caj fwn dingz youh gwn doxgaiq, couh doq dawz aen liengjceij ciq hawj de lo.

Lauxbuen ma daengz ranz, yied ngeix yied ndatheiq. De dawz aen liengj dumz cuengq youq henz dou, naeuz:“Mwngz ged a, gou cungj mbouj gven aen liengj mwngz, doeklaeng rox soengq hawj dauq mwngz, ciq aen liengjceij hawj gou, daengz ranz ndang dumzcatcat.”

Caiq gangj Lauxvuengz mbiengj- neix, caj Lauxbuen deuz le, de dawz vanj dang daeuhfouh caeuq deb rangz cauj noh ndeu okdaeuj, gwn dwk feihdauh raixcaix.

Ngoenz daihngeih, mbwn lij caengz rongh, Lauxvuengz couh hwnq congz lo. De baenzhwnz ninz mbouj ndaek, caenh siengj aen liengjceij de. Ciq aen liengjceij hawj Lauxbuen, de sim’in dangqmaz. De goq mbouj ndaej gwn haeux, ganjvaiq coh ranz Lauxbuen buet bae. Aenvih ngoenz- lwenz ngamq doek fwn, roen lij mbaeq, byaij dwk dinvaq de cungj dumz liux, lij miz namh, uqcuj dangqmaz.

Daengz ranz Lauxbuen, Laux- vuengz daj conghcueng yawj haeuj- bae, raen Lauxbuen lij ninz, aen liengjceij hai dwk cuengq youq baihlaeng dou. De ndatheiq dangq- maz, roengzrengz roq aen dou.

Lauxbuen deng roq singj lo, de bazlaz hwnqdaeuj hai dou. Lauxvuengz hozgaek dwk byaij haeujbae naengh youq gwnz daengq, naeuz:“Laux- doengz, haxbaenh gou riuj bingz youz ndeu daeuj siengj soengq hawj mwngz, byawz rox daeuj daengz buenq roen dad mbat laemx ndeu, bingz huq lo, youz lae liux, lij lw aen bak bingz.” Gangj sat iet aen bak bingz okdaeuj. Lauxbuen naeuz:“Ye, caen ienq lo.”

Lauxvuengz naeuz:“Gou daeuj caeux di, lij caengz gwn haeux, dungxiet lai, mwngz bae cawj di doxgaiq daeuj, gou gwn le caiq menh baema.” Lauxbuen naeuz:“Mwngz caj dwk, gou doq bae guh.” Gangj sat couh byaij haeuj bakcauq bae lo.

Sawqmwh dingqnyi duzgaeq swenjgakgak. Lauxvuengz hemq naeuz:“Lauxdoengz, loengh genjdanh di couh ndaej lo.” Lauxbuen han naeuz:“Mbouj loengh maz , cij aeuq rek dang nohgaeq ndeu.” Lauxvuengz dingq le, roxnyinh Lauxbuen doiq swhgeij caen dwg ndei.

Byaek hwnj daiz lo, aen vanj hung baij youq naj. Lauxvuengz byaengq da cim yawj ndaw vanj, ngamq raen ndaw dang miz geij di gyaeqgaeq. De siengj: Nanzdauh neix couhdwg dang nohgaeq? Lauxbuen cek naeuz:“Lauxdoengz a, mwngz daeuj mbouj deng seiz, danghnaeuz mwngz gvaq song sam ndwen menh daeuj, aen gyaeq neix gaenq faeg ok baenz gaeqlwg, ciengx daengz seizhaenx couh miz song sam gaen lo. A, dang nohgaeq geijlai feih a!”

Lauxvuengz dingq le ndatheiq dangqmaz, de siengj ndaq geij coenz, hoeng gangj mbouj ok, cijndei ngaemgyaeuj gwn dang. Gwn liux le, Lauxvuengz naeuz:“Lauxdoengz, gou cinjbi baema lo, roen mbaeq lai, mwngz ciq gouh suijhaiz mwngz hawj gou daenj baema, daengz mbwnbiengj roen hawq le gou menh soengq daeuj hawj mwngz.” Lauxbuen lauxlaux saedsaed dwk dawz gouh suijhaiz ndenq hawj de. Lauxvuengz duet doiq haiz bonjfaenh, daenj doiq suijhaiz Lauxbuen, gaem aen liengjceij swhgeij caeuq doiq haiz dumz de baema lo.

Mbwn laep lo, Lauxvuengz yaek ninz lo, de yawj gouh suijhaiz Lauxbuen, siengj: Mwngz dawz aen liengjceij gou baema ranz hai baenz hwnz, gou hix aeu daenj gouh suijhaiz mwngz hwnz ndeu cij ndaej. Doeklaeng, de couh daenj gouh suijhaiz Lauxbuen ninz lo.