Gou daj iq couh biz, mwh iq biz roxnyinh gig dwggyaez, hoeng hwnj siujyoz le, cij rox “biz” cih saw neix dwg vaihcawq lai, ndeicawq noix, dahraix, youh miz mazfanz lo.

Gou geij ngoenz neix fatndat, yaek daj diuqcim, hoeng, aenvih gou biz lai, moix baez daj diuqcim cungj ra sailwed gig dwgrengz. Ngoenzneix gou dwg boux daih’it daeuj daj diuqcim, ra diegninz ninz roengzdaeuj le, boux daxheiz husw couh riunyumnyum byaij gvaqdaeuj naeuz:“Siuj baengzyoux, dajcim lo!” Gou saenzdidi iet fwngz okbae, aenvih boux daxheiz husw neix miz geij baez cungj dwg de bang gou dajcim, hoeng moix baez cungj dwg deng baek song baez cim, gou couh miz di lau lo. Daxheiz husw bekbek laengfwngz gou, gij najriu haxbaenh sikhaek mbouj raen lo. De miz di yousim yawj gaiqfwngz gou, naeuz: “Caen mbouj ndei baek ha!” Gou baez dingq, couh engq lau lo: Gaej baek mbouj deng ha, mboujne youh deng baek baez daihngeih lo! Daxheiz husw gaem guenjcim, menhmenh baek haeujbae, hoeng itcig mbouj raen hoiz lwed. Seizde fwngz gou gig in, gou haeb heuj dwk, yawj bakcim youq gwnz fwngz baedauq ra sailwed, gou youh lau youh in, sing iq cam:“Daxheiz, baek deng caengz?” Daxheiz husw aenda cim bakcim, naeuz；“Mbouj ndaej ha, mwngz biz lai, mbouj heih baek!” “A?” Gou heuh sing he, sawqmwh gamjdaengz baihnaj laepngau. Cim neix baek mbouj haeuj sailwed bae, daxheiz husw hix mbouj gamj baek lo, de heuh canghyw daeuj, canghyw baek mbat he couh baek deng sailwed lo. Mwh canghyw byaij bae naeuz:“Mwngz ha, wnggai gemjbiz lo!” Gou miz di mbouj swhyienz riu lo.

Hai, yawjdaeuj caen yaek gemjbiz lo, gemjbiz le couh mbouj yungh souh gij coih neix lo. Cungj dwg biz nyex hux, biz le couhdwg mbouj ndei ha!

(sam nienzgaep Lij Gyahsui)