Vanzgyangh dwg daengx guek aen Mauznanzcuz swciyen dog ndeu, youq ndaw yienh gvaengxlaengx miz Cuengh、 Gun、 Mauznanz、 Myauz、 Yauz、 Suij daengj cib lai aen minzcuz youq, daengx yienh gyaeujvunz 37.08 fanh boux, ndawde siujsoq minzcuz gyaeujvunz 35 fanh boux, ciemq daengx yienh cungjgyaeujvunz 94%. Vih ndeindei doihengz、 sawjyungh caeuq baujhoh hong Vahmauznanz, Vanzgyangh Minzyijgiz yungh sam aen banhfap roengzrengz cauxmoq, aeundaej itdingh cingzcik.

It dwg gaem ndei hong baihgonq hwnjlaeb sugigu Vahmauznanz. Gaenh bi neix daeuj, aen giz neix nyinhcaen cujciz lauxhangz Mauznanzcuz vat- cimh、 soucomz、 cingjleix sawloih ciengzyungh Mauznanzcuz、 gojgaeq ndawbiengz、 feizdau Mauznanzcuz daengj vwnzva minzcuz.

Ngeih dwg boqcuengq sinhvwnz densi Vahmauznanz, caiqlij aeu hong loegguh boqcuengq cugyamq byaijcoh cwnggveihva、 cangzdaiva.

Sam dwg nyinhcaen guh ndei hong loegguh denyingj Vahmauznanz, caemhcaiq haiguh denyingj Vahmauz- nanz roengz mbanj, vunzlai Mauz- nanzcuz hoizwngq gig ndei.

Ciuq cam rox, aen giz neix daj bi 2014 ndwen 5 hainduj couh anbaiz hanghmoeg bouxdaiqdaeuz hainduj guh hong, caemhcaiq youz bouxvunz Mauznanzcuz Danz Yenjyangz cujciz soucomz、 cingjleix sawloih Vahmauz- nanz, gvinab gij vahyaem caeuq yijfaz Vahmauznanz; youz bouxvunz Mauz- nanzcuz Cinz Swgunh cujciz soucomz gij caizliuh vahgangj ciengzbien vah Mauznanzcuz, cingjleix loegguh feiz- dau Mauznanzcuz. Doengzseiz youq ndaw yienh haiguh denyingj roengz mbanj ca mbouj geijlai 100 ciengz, aeundaej yaugoj haemq ndei. Aen yienh neix Minzcuz Cunghyoz、 Vanzgyangh Daihsam Siujyoz daengj cungj laebdaeb hailaeb le gangj gojgaeq Vahmauznanz、 hag go Vah- mauznanz daengj goqcingz, hawj vwnzva minzcuz byaij haeuj ndaw saedceij hagdangz bae.

(Danz Su’myauz/谭素苗)