Daeggo seizhah ngamq biek bae, dahcej seizcou couh daeuj- daengz lo. De yungh gonjbit saenzgeiz de, veh ok baenz fuk baenz fuk dozveh gyaeundei daeuj.

Dahcej seizcou byaij haeuj ndaw doenghnaz yawj mbouj raen henz haenx bae, caca geij mbat veh hwnjdaeuj. Sawqmwh, gohaeux henj lo, raq rumz he ci gvaq, doenghnaz fan hwnj langhgim henjrwgrwg, lumj aenhaij saekhenj nei. Gofaiq hau lo, baenz duj baenz duj faiq lumj baenz aen baenz aen giuzsiet, daj gizgyae yawj bae, reihfaiq couh lumj goemq hwnj fan denz siet he. Baenz go baenz go megmax lumj bogfeiz yaengx hwnj sang nei, vifung ndwn youq henz loh. Haeuxyangz angq raixcaix, de vuenh hwnj geu buhmoq saekhenj he, hai aenbak riu dwk, loh’ok gij heuj henjriri……Bohlungz nungz- minz yawjraen fuk dozveh neix, angqvauvau naeuz:“Dahsau seiz- cou, docih mwngz!”

Dahcej seizcou daeujdaengz ndaw suenmak, youh caca daz hwnj geij mbat, ndaw suenmak yaepyet couh bienq yiengh lo. Laj mbawfaex heuyauyau, ndoj miz makit saekaeuj launyaenq haenx. Maksigloux byaengq hung lwgda, ceng dwk yawj dahcej seizcou dauqdaej maj ndaej baenzlawz yiengh. Makgam venj youq gwnz faex, lumj baenz aen baenz aen daengloengz iq, gyoengqde cingq humx youq giz ndeu laeglemx gangj vah ne!

Dahcej seizcou youh daeuj- daengz ndaw gunghyenz, de youh caca daz hwnj geij bit, gunghyenz sawqmwh couh bienq baenz gak saek gak yiengh. Vagut daenj hwnj buhmoq, miz saekhenj、saekhau、saekgyaemq; dahnuengx va’gveiq ndangreuxred, baez mbouj siujsim raemxhom byoq lai lo, gij feihhom de youq gizgyae cungj nyouq ndaej daengz; raq rumz he ci daeuj, mbaw faexyinzging mbinyagyag, lumj duzmbaj saekhenj nei youq gyangmbwn diuqfoux.

Gonjbit dahcej seizcou caen saenzgeiz, de aeu lajbiengz bienq- baenz fuk doz gyaeundei he lo!

（haj nienzgaep Cau Yi）