Dienheiq yied daeuj yied ndat lo, youq Namzningz gyoengq doengzhag cungj buet bae youzyungjciz youzraemx. Raen gyoengqde bae youzraemx deng ndit dak dauqma cungj ndaem liux, gou couh naemj daengz aen mboq laeng mbanj gou lo. Aen mboq haenx raemx sawyauyau, vunz mbanj geijcib bi gvaqdaeuj cungj dwg gwn raemxmboq gvaq saedceij, moix bi seizcin fwn hung doek le, raemx couh daj ndaw mboq lae okdaeuj lo.

Gangj daengz aen mboq, lij iq youq ndaw mboq miz haujlai yinxdaeuz. Daj iq gou couh ndaej nyi bouxgeq gangj naeuz ndaw mbanj aen mboq haenx miz vaizgim, duz vaizgim rox haeb vunz. Hoeng, danghnaeuz bouxlawz beng ndaej saek dug bwn duz vaizgim haenx, dawz bae ndaw loengx miz ngaenz haenx cuengq, gvaq mbouj ndaej geij nanz couh bienq haujlai ngaenz okdaeuj, siengj aeu geijlai couh miz geijlai. Danghnaeuz mwngz dawz bae ndaw canghaeux cuengq, couh miz gyoengq haeux lae okdaeuj. Dou gyoengq lwgnyez gig saenq vah bouxlaux, moix daengz raemxmboq lae okdaeuj, dou gyanghaemh roengz- dangz couh bae ndaw mboq youzraemx. Seizhaenx, daeggo gou caeuq geij boux lwgsai cungj ndaem roengz baihlaeg bae, siengj ra duz vaizgim haenx, mbangj mbat gou hix caeuq de caez ndaem roengzbae. Hoeng cij raen lajdaej miz sa ndwi, gijwnq cungj yawj mbouj raen. Mbatmbat bae youzraemx cungj ra mbouj raen duz vaizgim, gik ra couh youq ndaw mboq youzraemx guhcaemz. Daj siujhag youz daengz co’cung, youz miz haj roek bi lo, hoeng cungj mbouj miz saek mbat ndaej raen duz vaizgim haenx.

Laepda haida 10 bi gvaqbae lo, itcig cungj mbouj raen duz vaizgim gvaq. Mbouj gvaq aen mboq haenx ciengx le geijcib daih vunz, gung ok haujlai vunzcaiz. Fueng raemx namh ndeu, ciengx fueng vunz ndeu. Raeuz cungj bae ndaw mboq ra duz vaizgim haenx, gizsaed aen mboq neix couhdwg duz “vaizgim” raeuz!