Gaxgonq miz boux vunzlaux ndeu fat bingh youqgaenj raixcaix, de roxnyinh bonjfaenh lix mbouj geij nanz lo, couh heuh sam daeglwg daeuj daengz henz congz, daengq gyoengqde naeuz:“Lwg a, daxboh sou seiqvunz gungz he, seizneix couh yaek lizhai sou lo. Mbouj miz maz hawj sou, gou ciengx ndaej 19 duz vaiz louz hawj sou. Yienghneix, Daeghung aeu ngeih faenh cih it, Daegngeih aeu seiq faenh cih it, Daegsam aeu haj faenh cih it.” Gangj sat, boux vunzlaux couh dai lo.

Daxboh dai lo, sam daeglwg siengsim dangqmaz, gyoengqde cangq daxboh le, couh daeuj henz rienghvaiz caep cawq faen vaiz. 19 duz vaiz, ngeih faenh cih it、seiq faenh cih it、haj faenh cih it cungj mbouj dwg cingjsoq, baenzlawz faen ne? Daegsam naeuz:“Dawz gij vaiz faen lw haenx gaj le caiq faen.” Daeghung naeuz:“Mbouj ndaej gaj, cojgoeng geijlai daih roengzdaeuj cungj yawj duzvaiz lumj vunzcaen, gaj vaiz couh dangq gaj vunz lo.” Daegngeih naeuz:“Dwg a, dwg a, duzvaiz dangq bouxvunz, gaj mbouj ndaej!” Vaiz hix mbouj ndaej gaj, vah daxboh hix yaek ciuq hengz, sam beixnuengx siengj dwk uk vauq bae, cungj siengj mbouj ok saek aen banhfap daeuj.

Cingq youq seizneix, Audwz ndaw mbanj byaij gvaq gizneix, yawjraen sam beixnuengx najsaep dwk ndwn youq henz rienghvaiz, couh cam gyoengqde miz maz saeh, sam beixnuengx couh lwnh gij vah daxboh hawj Audwz nyi.

Audwz naemj yaep he, naeuz:“ Yienghneix guh, gou dawz duzvaiz gou ciq hawj sou, sou couh ndei faen lo.”

Daeghung naeuz:“Mbouj ndaej, ranz mwngz cij miz duz vaiz he, raeuz aeu le mwngz baezlaeng baenzlawz gvaq saedceij.”

Audwz riu naeuz:“Mbouj youqgaenj, gou gaenq betcib geij bi lo, lix mbouj geij nanz lo, louz duz de mbouj miz yunghcawq geijlai lo.” Gangj sat couh bae ndaw rienghvaiz de yien duz vaiz de okdaeuj gyau hawj sam beixnuengx.

Doeklaeng, sam beixnuengx couh ciuq gij vah daxboh bae faen 20 duz vaiz. Daeghung faen ndaej ngeih faenh cih it, yien 10 duz vaiz angqvauvau deuz lo. Daegngeih ndaej seiq faenh cih it, de gyaep 5 duz vaiz swhgeij habhoz dwk ma ranz lo. Daegsam naeuz:“Gou ndaej haj faenh cih it, couh dwg 4 duz vaiz.”

Audwz riu dwk naeuz:“Sam beixnuengx sou gungh yien bae 19 duz vaiz, seizneix lij lw duz dem, wnggai dwg duz gou lo.” Gangj sat, Audwz yien duz vaiz swhgeij coh rienghvaiz de byaij bae.

Daegsam yawj ngaeuzndang hungsang Audwz, mbouj dingz dwk ngaekngaek gyaeuj.