Dahcej seizcou youq ranz mbwq lai lo, dajsuenq okbae guhcaemz saek yaep. De dawz gak cungj gak yiengh liuhsaek、gij feih homfwd, lij miz haujlai doxgaiq yinxdaeuz, cungj coux haeuj aendaeh hung de bae.

Dahcej seizcou daeujdaengz ndaw ndoengfaex, de angq dwk daz mbawraeu baenz saeknding, baenz mbaw baenz mbaw mbawnding, lumj bogfeiz dawzyubyub nei. De aeu mbawyinzging nyumx baenz saekhenj, baenz benq baenz benq mbawyinzging lumj baenz fag baenz fag beiz nei. Dang de yaek hawj gocoengz nyumx mbaw seiz, deng mbawcoengz soem camz mbat he, yienghneix de nunu gaiqfwngz deng camz haenx, buet bae lo. Raq rumzcou liengzsisi he ci daeuj, dahcej seizcou haetcwi sing hung he, doeklaeng cauhhux lo, haujlai haujlai mbawfaex cungj deng saenqdoengh loenq roengzdaeuj lo.

Dahcej seizcou youh buet daengz ndaw suenmak guhcaemz, de mbouj siujsim laemx mbat he, feihhom daj ndaw daeh de mbin okdaeuj, sinz youq gwnz aenmak, yienghneix makleiz ha, makdoengj ha, makbingzgoj ha, cungj bienq- ndaej homfwdfwd, diemzsisi.

Dahcej seizcou lij bae ndaw doenghnaz、ndaw suenbyaek, ndaw gunghyenz……mwh loh gvaq hagdangz, de sawqmwh siengjhwnj swhgeij lij miz cozyez caengz sij sat ne, yaek ganjvaiq ma ranz sij cozyez lo.

Youq gwnz loh ma ranz, de yawjraen daxgoeng seizdoeng okdaeuj youzbyaij lo……

(sam nienzgaep Cangh Mingz- yenh)