9 nyied 8 hauh, Cungzcoj Si Minzyijveij youq Fuzsuih Yen ciuhai 《Fwen Comz Bouxcuengh》 daihseiq cek hoih hong bienhoiz beizyin. 6 aen yen(si、gih) 20 boux vunz bienhoiz camgya aen hoih neix. Aen hoih beizyin neix iucingj Swcigih Minzyijveij Gohyenzcu cucangj Vangz Yuzmungj、diuyenzyenz Vangz Beihingh doiq Cungzcoj Si hong bienhoiz fwen comz Bouxcuengh haenx guh gidij cijdauj.

Youq gwnz hoih,Vangz Yuzmungj gaisau dangqnaj gih raeuz guh hong minzcuz yijvwnz cingzgvang caeuq gij youqgaenj de hawj gyoengq yozyenz. De naeuz vah minzcuz couhdwg gij hoenz minzcuz, guh hong minzcuz yijvwnz mbouj ndaej gaenj aeu gouz baenz, naeuz gak gaep bouxguhhong minzcuz yijvwnz aeu roengzrengz hag bonjsaeh, nyinhcaen guhndei hong minzcuz yijvwnz swnjcienz caeuq baujhoh. Vangz Beihingh cix hawj gyoengq yozyenz guh yezvu fujdauj, doiq gij cozbinj ndaej senj haeuj haenx youq Cuengh Gun bienhoiz、biu gozci yinhbyauh、cih saw baizbanj daengj fuengmienh miz vwndiz haenx guh faenloih diemj bingz, lij daez ok yigen baenzlawz gaij caeuq iugouz.

(Liengz Cinbyauh / 梁振标 Luz Gunh / 陆 琨）