Yozgiz moq ngoenz daih’it, bakdou hung Ginhsiz Siujyoz, song aen cigiuhuceh “ngeu ngeu ngeu” nei hemq guh mbouj dingz mbouj duenh .

Daihgaiq aen cungdaeuz gaxgonq, Ginhsiz Siujyoz ngeih nienzgaep banhcujyin Vangz Cwng bongh haeuj yaucangj bangunghsiz bae, heiq gwnz mbouj dem heiq laj muengzfwdfwd doiq yaucangj naeuz, aen ban de miz cib geij boux lwgnyez heuh naeuz dungxin raixcaix, banneix daejngaungau ne!

“Gijmaz! Cib geij boux lwgnyez!” Yaucangj “dang” baez ndeu coq aen cenjcaz ngamq yo daengz henz bak haenx dauq gwnz daiz bae, lienzmuengz byaij ok bangunghsiz, Vangz Cwng muengzfwdfwd riengz youq baihlaeng. Daeuj daengz aen gyausiz ngeih nienzgaep, yaucangj lienzmuengz fuz geij boux lwgngez hwnjdaeuj, cam dauqdaej ok saeh maz lo, hoeng gyoengq lwgnyez cij naeuz dungxin lai dingj mbouj ndaej, hix gangj mbouj ok vihmaz dungxin.

Yawjraen cib geij lwgnyez boux daej daej boux heuh heuh, yaucangj simgaenj dangqmaz, doiq Vangz Cwng naeuz:“Vaiq! Dwk denva heuh cigiu- huceh daeuj!” Vangz Cwng sikhaek dwk denva hawj yen yihyen.

Mbouj daengz 40 faencung, song aen cigiuhuceh couh hai daengz bakdou yozyau lo. Cib geij boux lwgnyez ndaej ram hwnj ci bae.

Bungz daengz gij saeh hauhneix, yaucangj naeuz ceiq ndei hawj gyoengq cawjranz lwgnyez rox cingzgvang. Vangz Cwng couh dwk doeng denva boux cawjranz ndeu, lwnh gij saeh hawj de nyi.

Gyoengq cawjranz ngeih nienzgaep neix, miz haujlai boux doengz youq Gvangjdungh dajgoeng, cib geij ngoenz gonq doengz dauqranz gvaq ciet caet nyied cibseiq, banneix ciet gvaq liux, lwgnyez youh yaek haihag, gyoengqde couh doxdap bauci dauqbae Gvangjdungh dajgoeng lo. Byawz rox ci ngamq hai ok mbanj aen lai cungdaeuz, couh dingqnyi Vangz Cwng lauxsae naeuz lwg swhgeij ok saeh lo. Gyoengqde sim diuqdwkdwk, sikhaek naeuz hawj bouxdawzci hai ci doxdauq.

Gyoengq lwgnyez deng soengq daengz yen yihyen mbouj geij nanz, gyoengq cawjranz caemh daeuj daengz lo. Aenvih yihyen naeuz banneix gyoengq lwgnyez cingq youq genjcaz, mbouj ndaej bae yawj. Goengq cawjranz miz vunz couh hainduj ienq hwnjdaeuj lo, naeuz bibi gyau ngaenz hojsizfei hawj yozyau, gij ngaenz haenx haengjdingh deng gyoengq lauxsae gaep bae lai, sizdangz cij rox aeu gij doxgaiq mbouj seuq daeuj hawj lwgnyez gwn, ndigah cij miz gij saeh neix okdaeuj…… Gyoengqde boux gangj neix boux gangj haenx, cungj mbouj miz coenz vah ndei lawz. Gyoengq lauxsae miz leix mbouj rox daj gizlawz gangj, gig mbouj cwxcaih.

Cib geij boux lwgnyez dungxin deng soengq haeuj yen yihyen, gij saeh neix gig hung, yen cwngfuj youq gyoengq lwgnyez ndaej ram hwnj cigiuhuceh seizhaenx couh rox gienh saeh neix lo, yienzhaeuh sikhaek baij sizbinj caeuq veiswngh bumwnz bae diucaz aen sizdangz yozyau.

Banringzgvaq, yihyen genjcaz ok gezgoj le. Hoeng, gij hawj vunz siengj mbouj daengz dwg: Yihyen naeuz ra mbouj ok vihmaz lwgnyez dungxin! Gyoengq cawjranz dingqnyi youh hemq hwnjdaeuj, naeuz yihyen mbouj baenz yihyen, cij rox caeuq yozyau guhgyoengq yaeuh vunz aeu ngaenz.

Gyoengq cawjranz hozhwnj seiz, gyoengq lwgnyez daj ndaw yihyen okdaeuj lo. Gyoengq cawjranz lienzmuengz veiz gvaqbae, gag boux gag umj lwg swhgeij cam gwnz cam laj, hoeng, gij lwgnyez cungj goemzgyaeuj mbouj oksing. Yihyen yencangj naeuz, danghnaeuz gyoengq cawjranz mbouj cuengqsim, yihyen hawj aen cigiuhuceh ndeu soengq gyoengq lwgnyez bae si yihyen genjcaz. Gyoengq cawjranz doengzeiq lo, hoeng gyoengq lwgnyez mbouj nyienh, dailix dajlaih hix mbouj hwnj ci.

Cingq dwg seizneix, baih veiswngh caeuq sizbinj bumwnz genjcaz hix miz gezgoj lo, gezgoj dwg gij gwn sizdangz yozyau mbouj miz maz vwndiz. Gyoengq cawjranz menhmenh cuengqsim di lo, hoeng bouxboux youh ngeiz hwnjdaeuj: Gijmaz cungj mbouj miz vwndiz, vihmaz cib geij boux lwgnyez doengzcaez naeuz dungxin ne?

Yijvwnz lauxsae Cangh Meiz dwg boux gig miz gyauyoz ginghyen ndeu, de lumjbaenz yawj ok di saeh maz nei. Couh umj lwgnyez ndeu haeuj rungj daeuj menh rub aen gyaeuj de menh naeuz: “Mwngz bingzciengz ceiq gvai lo, miz saeh maz cungj caeuq lauxsae gangj caen, banneix mwngz siengj maz couh caeuq lauxsae gangj, mbouj yungh yaeuh bouxlaux naeuz dungxin bw, yienghneix lauxsae caeuq bohmeh cungj yousim mwngz dahraix bw!” Gyoengq bouxlaux dingqnyi Cangh Meiz baenzneix gangj, hix ngeiz hwnjdaeuj lo: Nanzdauh gyoengq lwgnyez neix caen yaeuh vunz, mbouj dwg caen dungxin?

Boux bohranz ndeu nyaenx mbouj ndaej couh rag lwg bonjfaenh de daengz doiqnaj hemq naeuz: “Mwngz caen dungxin couh hwnj ci bae si yihyen genjcaz, mbouj miz bingh couh bae ranz, gou caeuq meh mwngz lij yaek bae Gvangjdungh dajgoeng, mboujne bae gyawz aeu ngaenz ciengx mwngz!” Byawz rox boux bohranz neix ngamq hemq liux, lwg de couh daejngaungau hwnjdaeuj, naeuz: “Gou couh mbouj siengj hawj sou ok baihrog bae, gou couh siengj ngoenzngoenz caeuq sou doengz youq……” Lwgnyez neix baez daej, gij lwgnyez wnq hix doengzcaez daej hwnjdaeuj.

Cangh Meiz lauxsae sikhaek rox dwg maz saeh lo, de doiq gyoengq cawjranz naeuz:“Gyoengq lwg sou mbouj miz maz bingh ne, gyoengqde gig lauxsaed, cungj laihnaeuz baenzbingh le bohmeh couh ndaej ce roengzdaeuj buenx de, ndigah bouxboux naeuz dungxin.” Dingqnyi Cangh laux- sae gangj, boux bohranz haxbaenh haenx sim’unq roengzdaeuj di lo, menhmenh doiq lwg de naeuz:“Mwngz couh siengj hawj bohmeh ce roengzdaeuj cij canggyaj naeuz dungxin dwg mbouj dwg? Bohmeh mbouj gvaiq mwngz, mwngz yaek doiq bohmeh gangj caen bw!” Lwg de cij menhmenh uet raemxda menhmenh gangj okdaeuj……

Yenzlaiz, haetneix Ginhsiz Siujyoz gyoengq lwgnyez ngeih nienzgaep doxcaeuq bae yozyau, youq gyang roen bouxboux naeuz ciet caet nyied cibseiq caeuq bohmeh bae gyawz guhcaemz, bae gyawz youz, sim’angq dangqmaz, gangj dwk gangj dwk, menhmenh couh sij mbouj ndaej bohmeh ok rog bae dajgoeng lo. Miz lwgnyez ndeu heuhguh Dahfangh, de naeuz bi’gvaq ndwencieng, de baenzbingh, daxmeh de couh ce roengzdaeuj buenx de sam ndwen lai. Hauhneix, lwgnyez wnq couh naemj: Danghnaeuz swhgeij hix baenzbingh lo, bohmeh de hix ndaej ce roengzdaeuj buenx swhgeij lo. Ndigah gyoengq lwgnyez couh doxdag naeuz bae daengz yozyau doengzcaez heuh dungxin, hawj lauxsae rox, gangj mbouj dingh lauxsae heuh bohmeh dauq ranz bw! Couh hauhneix, cij miz gij saeh baihlaeng haenx. Laeng gyoengq lwgnyez raen mboujlwnh lauxsae roxnaeuz bohmeh swhgeij cungj vih gienh saeh neix simvueng liux, couh rox gij saeh neix deng nauh hung lo, couh dajlaih mbouj gamj hwnj ci bae si yihyen, lau bohmeh rox couh deng dub.

Dingqnyi lwgnyez neix gangj, gyoengq cawjranz bouxboux ndaeng soemj caez.

Rox lwg swhgeij caen mbouj miz bingh, gyoengq cawjranz couh cuengqsim lo. Hoeng, yawjraen gyoengq lwgnyez ing youq aen rungj bohmeh vuenyungyung, yaucangj gyangznaek dwk doiq gyoengq cawjranz naeuz: “Sou laihnaeuz lwg sou caen mbouj miz bingh ma? Gou naeuz gyoengqde caen miz bingh dahraix, sou bouxlaux ciengzseiz okbae dajgoeng, ce lwg gag youq ranz, gij lwg sou ciengzseiz mbouj miz vunz buenx, ndawsim guhlawz mbouj baenzbingh ha, sou laihnaeuz ndwenndwen geiq ngaenz dauq hawj lwg couh baenz lo, mbouj dwg hauhneix ha, gyoengq lwg sou mbouj noix gwn mbouj noix daenj, couh noix sou youq henz ndang bae buenx de, bae gyaez de.”

Dingqnyi yaucangj gangj neix, gyoengq cawjranz ndwn youq gizhaenx, mwngz yawj gou gou yawj mwngz, nanznanz cungj mbouj miz vunz gangj coenz vah lawz.