8 nyied 27 hauh daengz 9 nyied 2 hauh, bi 2016 aen singhgiz doxgyau minzsuz vwnzva saujsu minzcuz Namzningz Daizvanh youq Namzningz banh, 55 boux beix- nuengx Daizvanh daj Daizvanh Vahlenz Yen haijyaz song hamq saujsu minzcuz doxgyau hezvei、 Daizbwz Si cungh siuj hagdangz yaucangj hezvei nem bohranz lenzhozvei song aen camcunzduenz daeuj haenx camgya le hozdung.

8 nyied 29 hauh, bi 2016 aen singhgiz doxgyau minzsuz vwnzva saujsu minzcuz Namzningz Daizvanh gaihmusi youq Guengjsae Minzcuz Cunghdwngj Conhyez Hagdangz banh, 55 boux beixnuengx Daizvanh daj Daizvanh Vahlenz Yen、 Daizbwz Si daeuj haenx caeuq beixnuengx gak cuz Namzningz Si doxcomz youq giz haenx, itheij ciengq go minzcuz, caez diuq foux minzcuz, hainduj le aen singhgiz doxgyau hozdung. Yienhciengz nauhyied raixcaix, gyoengq doengz- hag Guengjsae Minzcuz Cunghdwngj Conhyez Hagdangz caeuq gyoengq bouxcoz nyezrauh Vahlenz Yen camcunzduenz guh le biujyienj vwnzyi ndeiyawj.

Gaihmusi gvaqlaeng, gyoengq- vunz Daizvanh Vahlenz Yen haijyaz song hamq saujsu minzcuz doxgyau hezvei、 Daizbwz Si cungh siuj hagdangz yaucangj hezvei nem bohranz lenzhozvei song aen camcunzduenz neix lij bae Majsanh Yen gaujcaz doxgyau minzcuz minzsuz vwnzva, gonqlaeng yawj- ngonz le Majsanh Minzsuz Vwnzva Langhbaijguenj, yawjngonz le vwnzyi biujyienj gyonghoih Bouxcuengh Majsanh、 fwenhab Bouxcuengh、 dwklongj Bouxcuengh daengj, caemhcaiq caeuq doihgyonghoih Bouxcuengh Majsanh Yen guh le doxgyau, saeddieg gaujcaz le Lunglah Sahmova Langhbaijguenj; linghvaih, lij bae yawjngonz le dieggaeuq dingjhoenx Yizbwnj Gunhlunzgvanh、 Guengjsae Minzcuz Bozvuzgvanj、 Guengjsae Minzcuz Cunh daengj dem, roxnyinh gij goekgaen minzsuz vwnzva minzcuz、 daegsaek Mbanjcuengh naekna Namzningz caeuq gij yinxdaeuz hawsingz swnghdai habyouq yayezdai fungcingz neix.

（Liuz Gen’anh/刘建安）