Mboengqneix gou maez hwnj geij bonj sawgovai, doeklaeng nguh hagsib lo, geizgyang gaujsi gaxgonq hix mbouj nyinhcaen fuzsiz gunghgo. Mwh gauj yijvwnz, miz haujlai daez gou mbouj rox guh. Yawj bouxwnq nyinhcaen gaujsi, gou simgip dangq- maz. Doeklaeng gou luenh sij dapanq hwnjbae couh gyau sigenj lo. Gauj sat le, haujlai doengzhag gangj baez yijvwnz gaujsi neix mbouj nanzguh, haujlai daez cungj dwg lauxsae heuh daihgya boih gvaq. Gou gag siengj, baezneix camj lai lo, baez gaujsi neix haengjdingh dwg ndaw ban boux gauj ndaej ceiq ca lo.

Daengz ngoenz gunghbu gaujsi cingzcik, gou caeuxcaeux couh ndiu lo, ninz youq ndaw mbonq mbouj gamj hwnqdaeuj, ndawsim gig mboujonj. Daxmeh daeuj heuh gou hwnqmbonq, yawj gij yiengh gou le naeuz: “Baenzlawz ha? Bingh la?” Gou dingq le, ganjgip swnh bak naeuz: “Meh, gou lumjbaenz bingh lo, daengx ndang hojsouh, mwngz bang gou cingj ngoenz gyaj he ba.” Daxmeh ganjgip aeu dijvwnhcinh daeuj rau, naeuz:“Mbouj ndat ha, mboujmiz couh bae veiswnghsoj yawj bingh ba!” Baez dingq daxmeh yaek daiq gou bae veiswnghsoj, gou ganjgip naeuz:“Gaej sai cienz lo, gou ninz yaep ndeu couh ndei lo, mwngz bang gou cingjgyaj gonq ba.” Daxmeh yawj gou lumj miz maz mbouj deng, couh cam naeuz:“Mwngz mbouj lumj baenzbingh ha, mwngz miz gijmaz saeh muenz gou ba?” Gou aeu denz hoemq gyaeuj, mbouj gamj gangj vah. “Caiq mbouj gangj gou couh moeb mwngz loha!” Daxmeh sing hung hwnjdaeuj. Daxmeh huj lo, gou ganjgip naeuz:“Baez yinjvwnz gaujsi neix gou gauj ndaej mbouj ndei, ngoenzneix lauxsae senhbu cingzcik, gou lau saetnaj, ndigah couh……” Daxmeh dingq gou gangj le engq huj lo, de rag gou hwnqmbonq, soengq gou bae hagdangz.

Daengz hagdangz le, daxmeh aeu gij saeh gou cang bingh haenx lwnh hawj lauxsae nyi. Gou naj nding dwk ngaem gyaeuj roengzdaeuj mbouj gamj gangj vah. Lauxsae vah naek cingz laeg doiq gou naeuz:“Siujcoz, simcingz mwngz gou gojyij lijgaij, hoeng yungh fuengsik cang bingh mbouj ndaej gaijgez vwndiz, lij saet bae bouxwnq doiq mwngz saenq- nyaemh, yienghneix mwngz saet bae haenx mbouj dandan dwg baez gaujsi cingzcik he bw……” Dingq gij vah lauxsae le, gou ngaem gyaeuj daengz diegnaengh gou, ndawsim ienqhoij dangqmaz.

(seiq nienzgaep Liengz Siujcoz)