Gou daj iq couh maj youq ndawsingz, doiq ndawsingz cauzhuhu haenx miz di mbwq lo, geijlai maqmuengh yawjraen funghgingj gyaeundei ndaw daswyenz, dijvei daengz cungj gamjcingz youh soh youh lauxsaed haenx ha. Cungj siengjfap neix dauqdaej ndaej saedyienh lo, cuengqgyaj le, gou bae ranzcoj lajmbanj, gamjsouh daengz le fungh- gingj mbouj doxdoengz.

Raemx Laecoco

Byaij youq song hamq rij, baiz faexliux henz rij nye de duengq roengzdaeuj, byai faex yaengyaeng rub najraemx, seiz mbouj seiz riengz rumz bi bae bi dauq. Raemxrij menhmenh laecoco, lumj danz diuz go he, angqyangz youh ndeidingq. Rinreq laj raemx, yawj ndaej gig cingcuj, gou naengh youq henz rij, iet ga roengz raemx bae, laep da hwnj, gamjsouh rumzliengz caeuq faexheu, aensim gou mbin hwnj gwnzmbwn, mbin daengz daihhaij, mbin daengz cauj- yenz ……

Va Homfwdfwd

Gvaq haujlai nanz, gou menh- menh hai aenda, daenj hwnj haiz mad, laebdaeb byaij loh, ngonzyawj itloh funghgingj.

Yawj, baenz duj baenz duj vameizgveiq nding lumj feiz, baenz caz baenz caz vamauxdan, maeq lumj fwjhaemh, baenz go baenz go valeiz, hau lumj siet…… Couh yienghneix, byaij dwk byaij dwk, yawj dwk yawj dwk, itmienh byaij itmienh yawj! Couh hawj gou maez youq ndaw geh va ba, couh hawj gou lumz seizgan ba, couh hawj gou ndeindei gamjsouh moix duj va gyaeundei neix ba.

Saenzcingz Raeujrub

Itloh mbouj miz muzdiz cwxcaih youzbyaij, doeklaeng miz di baeg lo. Cingq youq mwhhaenx, yawjraen gwnz bya miz ranz he, hoenzfeiz mbin- yang’yang, yienghneix gou haeuj ranz cam gwn raemx. Ndaw ranz miz dax buz he, daxbuz lienzmuengz ndenq vanj raemxsaw he hawj gou, de cam: “Dahsau, lij caengz ndaej gwn ba? Daeuj, doxcaez gwn di ba!” Gangj dwk, gaenq baenq ndang daek haeux hawj gou lo. Mwh gwn haeux, daxbuz mbouj dingz nip byaek hawj gou, riuhwhw naeuz；“Dahsau, dwg daj ndawsingz daeuj ba, maj ndaej saundei lai lo.” Daxbuz gangj ndaej hawj gou cungj mbouj ndei eiqseiq lo, de cix lumj yawj dujva nei yawj dwk gou riu. Daxbuz geijlai sienh ha! Gwn haeux sat le, gou naeuz: “Daxbuz, gou daeuj bang mwngz swiq vanj ba!” “Ndei、ndei, caen dwg dahsau ndei ndeu ha!”

……

Song boux vunz mbouj doxrox, cix mbouj miz saek di gekhaed caeuq daezfuengz, miz haenx dwg yiedcingz caeuq caencingz. Dwg ha, youq lajmbanj geij ngoenz neix, gou gamjsouh daengz le gij sienhsoh caeuq yiedcingz gyoengqvunz gizneix, yawj aennaj gyoengqde, bouxboux cungj baenzneix sienhsoh lauxsaed.

Itloh byaij ma ranz, fwjhaemh gaenq venj youq bien mbwn, ingjciuq loh funghgingj neix. Gou deng cungj funghgingj gyaeundei neix maez youq lo, deng vunzmbanj sienhsoh lauxsaed gamjdoengh lo, gou nyaenx mbouj youq haenh naeuz: “Gizneix fungh- gingj geijlai gyaeundei ha!”

(roek nienzgaep Cwngz Youh)