Mwh ngeih nienzgaep, gou bungz daengz bonj saw govai daih’it dwg 《Saunenz Wzdungz Bwzgoh Cenzsuh》, de lwnh gou haujlai cihsiz.

Daj mwhhaenx hwnj, gou gyaez hwnj doegsaw lo, gou doegsaw haeujmaez, ciengz- ciengz lumz gwn lumz ninz, gou cawz le moix ndwen dingh cazci daeuj yawj, lij ciengz cawx haujlai saw gohyoz daeuj doeg dem. Miz baez he daxmeh cam gou yijcou miz geij daih hingzsingh, gou dap miz bet daih hingzsingh. Daxmeh naeuz: “Mbouj deng, miz gouj daih hingzsingh.”“Bet daih hingzsingh!”“Gouj daih hingzsingh!” Gou mbouj caeuq daxmeh ceng, dawz ok bonjsaw 《Saunenz Wzdungz Bwzgoh Cenzsuh》daeuj, vix gwnz saw naeuz: Bet daih hingzsingh. Daxmeh lij mbouj fug, gou youh dawz ok lingh bonj sawdenhvwnz, gwnz saw dapanq hix dwg bet daih hingzsingh, song bonj saw dapanq cungj doxdoengz. Daxmeh baezneix cungj suenq fug saw lo: “Lwg ha, gou loek lo. Mwngz rox cihsiz beij gou lai ha! Caen dwg boux gohyozgyah iq he.” Dingq daxmeh yienghneix haenh gou, gou miz di daekeiq lo. Seizhaenx daxmeh daezsingj gou, youq diuzloh ciuhvunz mwngz, lij miz haujlai cihsiz yaek bae hag, gaej ndaengndiengq bw. Daj mwhhaenx hwnj, gou engqgya gaenx doegsaw lo, gwnz gyaqsaw gou saw hix yied daeuj yied lai lo.

(seiq nienzgaep Vuz Beicwngz)