40 bi daeuj, miz haujlai saeh gou cungj geiq mbouj ndaej lo. Hoeng, miz gij cingz mbawceij haenx gou cungj lumz mbouj ndaej.

Bihaenx gou ngamq doeg siujyoz haj nienzgaep. Baez ndeu singhgiz- sam banhaet, Vangz yaucangj daiq gou bae camgya cungh siuj hagseng suhfaz doxdax.

Baez haeuj ndaw gaujcangz, boux genhgauj lauxsae naeuz:“Gak boux senjsouj, baezneix doxdax aeu gag daiq ceij, neiyungz gag dingh, sou dwg daibyauj gak aen hagdangz daeuj doxdax, aeu gauj ok cwngzciz ndei di a.” Ya! Baenzlawz guh a? Gou cij daiq gonj bit ndeu daeuj ndwi, mbouj daiq ceij gvaqdaeuj. Gou dwg daibyauj hagdangz daeuj neix doxdax, dangh- naeuz…… Gou simgip dangqmaz, raemxda couh yaek lae okdaeuj le. Seizhaenx, aen hagdangz wnq dah senjsouj nienzgeij caeuq gou doxlumj ndeu yawjraen gou yienghneix, couh gangj vah nai gou:“Dah nuengxningq, mwngz vihmaz yaek daej?” Gou lwnh gij cingzgvang hawj de, de riu naeuz:“Mbouj youqgaenj, gou daiq haujlai mbawceij daeuj, gou baen mbawceij hawj mwngz sij.” Gangj sat de youq ndaw daeh baengz gek aeu geij mbaw ceij okdaeuj ndenq hawj gou.

Seizhaenx, gou yawjraen ndang dah haenx reuxringring, naj de luenzlili lumj namzgva, noh de haumbepmbep lumj gyaeqhau……Ciep aeu mbawceij le, gou gamj- doengh dwk raemxda lae okdaeuj, gou lij gikdoengh dwk naeuz:“Dahcej, docih mwngz!” “Mbouj miz maz, boux- wnq miz gunnanz, yawjraen couh wngdang bae bang.” De unqrad naeuz. Seizneix, ndaw gaujcangz geijcib doiq lwgda cungj ndomq song dou, ciep roengzdaeuj, dahcej haenx dawz bit okdaeuj hainduj sij saw. Gou hix haeujsim sij:“……Aen vaengz Dauz- vahdanz laeg cien cik, beij mbouj hwnj gij cingz Vangh Lwnz……”

Seizgan gvaqbae vaiq lumj naq, doxdax sat lo. Gou caeuq dahcej mbouj rox naj neix yaek doxbiek lo, ngoenzneix, gou gyo dahcej neix baen mbawceij hawj gou camgya doxdax, ndawsim gou angq baenz maz bae, aenvih de mboujdan soengq mbawceij hawj gou, engq youqgaenj dwg de son gou baenzlawz guh vunz.

Cibgeij ngoenz gvaqbae, doxdax gezgoj okdaeuj lo. Gou gawqyienz ndaej mingz daih’it, ndaw fwngz gou gaem mbaw cwngsuh gamjdaengz naeknengneng, ndawsim gou ngeix naeuz: Yienznaeuz gij ciengj neix dwg gou yungh rengz bae lienh saw ndaej daeuj, hoeng, lainoix hix miz gij goenglauz boux senjsouj youq gwnz gaujcangz baen mbawceij hawj gou. Mwngz naeuz, gou baenzlawz ndaej lumz gij cingz de ne?