□Siz Bungzcwngz/石鹏程

Ciengzseiz dingq Loz lauxsae nam naeuz:“Danghnaeuz gou hawj Daegngeih gvih roengzdaeuj baiq geij baez le, de couh ndaej boiz gij cienz daigvanj sinyungse haenx, gou hix cingznyienh gvih ha!” Seizneix bak- dou ranz Daegngeih gaenq maj gij nywj rim liux, diuz loh neix geijlai sug ha! Gij va geijlai ronghsien ha! Sien ndaej lwenqda, sien ndaej hawj vunz simluenh dangqmaz! Song bi lo, song bi neix daeuj Loz lauxsae itcig cij ndaej youq didanh cawx gij ien ma cit, sinyungse gaeu gij cienzhong Loz lauxsae bae boiz leihsik, aeya, cungj saedceij neix seizlawz cij daengz- gyaeuj ha? Cungj saedceij neix seizlawz cij sat ha? Loz lauxsae byoq gaemz hoenzien ndeu, ngauz gyaeuj mbouj dingz.

Song bi gonq haemh ndeu, mbwn laepsaengsaeng, iet fwngz mbouj raen saek cik lwgfwngz. “Dinghdoengh! Dinghdoengh!” Aen lingz bakdou Loz lauxsae yiengj lo, baenzneix hwnz lo, dwg bouxlawz ne? Loz lauxsae lumh aen gyaeuj ngeix. Baez hai dou, raen dwg Daegngeih ndwn youq bakdou, de riunyumnyum dwk, fwngz ndeu riuj byaekcug, fwngz ndeu riuj ien caeuq laeuj, naeuz:“Loz daeggo, baenzlai nanz mbouj raen mwngz lo! Haemh- neix raeuz caez ndoet laeuj! Dangh- naeuz mbouj miz maz saeh itdingh mbouj daeuj ranz mwngz ha!” “Ndei ha! Haeujdaeuj, haeujdaeuj caiq gangj!”

Daegngeih dwg caencik Loz lauxsae, caen daengz maz cingzdoh lienz gyoengqde hix gangj mbouj cingcuj. Haeuj ranz le, faen bouxcawj bouxhek naengh roengzdaeuj, hai bingz laeuj gwn, gangj gij goj ndaw ranz. Ndoet geij boi le, Loz lauxsae naj hoengzfwdfwd, Daegngeih youh ndenq ci ien Hungzdazsanh gvaqdaeuj, siuj- sim yubyub dwk bang Loz lauxsae diemj feiz. “Gou gag diemj, gou gag diemj!” Loz lauxsae sawqmwh ndaej yiengjsouh gij daiyi baenzneix ndei, lij gamjdaengz miz di mbouj gvenq, sikhaek vad fwngz dwk naeuz.

Sing “budoengh” ndeu, Daeg- ngeih gvih youq baihnaj Loz lauxsae:“Loz daeggo, gouqmingh ha! Cien dub fwngz lo! Gouz mwngz bang gou gvaq aen hamj neix a!” Loz lauxsae caengz raen gvaq cungj cingzgingj, gipmuengz fuz Daegngeih hwnjdaeuj naengh youq gwnz daengq, naeuz:“Miz maz gunnanz, gangj okdaeuj, raeuz dwg beixnuengx, gou miz naengzlig bang itdingh bang mwngz!”

Daegngeih lae raemxda mugmug myaizmyaiz dwk gangj gij gunnanz duenh neix ngamq bungz daengz. De naeuz ndaw ranz ciengx 100 lai duz mou, seizneix aenvih mbouj miz cienz cawx liuhgueng hawj duzmou gwn, duzmou cungj byom liux, lij miz song duz yaek dai lo! Seizneix gip aeu cienz bae cawx liuhgueng daeuj gueng. Loz lauxsae naeuz：“Ndaej caeuq aen diemqliuhgueng sisoq gonq ha!”Daegngeih naeuz：“Mbouj ndaej sisoq daiq lai, diemqliuhgueng hix miz gvidingh, gij liuhgueng 100 lai duzmou gwn mbouj suenq noix!” Loz lauxsae dingq le couh naeuz:“Gou dwg boux lauxsae, moix ndwen cienzhong 1000 lai maenz ngaenz, mbouj miz cienz ciq hawj mwngz.” Daegngeih naeuz:“Loz daeggo, gou mbouj ciq gij cienz mwngz, gou ciq sinyungse, seizneix dan noix bouxvunz daeuj danbauj, gouz mwngz youq mbaw ciqcienz giz bouxdanbauj ciem aen mingz mwngz, caiq yaenq aen yaenq- fwngz mwngz couh baenz lo!”

“Ndei ha!” Loz lauxsae mbouj caiq gangj maz lo, bouxwnq mbouj ciq cienz de, gauj fuyez bungz daengz gunnanz, miz naengzlig bang couh bang lo, dan ciem aen mingzcoh, caiq yaenq aen yaenqfwngz ndwi, neix miz maz nanz.

“Ngoenzcog couh bae banh gienh saeh neix!” “Ndei!” “Loz daeggo caen dwg boux seuqsang!” Daegngeih dauq loh’ok najriu lo.

“Ndoet liux!” “Ndoet liux!” Song aen boilaeuj angqyangz dwk doxbungz youq giz ndeu.

Ngoenz daihngeih youq gwnz haw ndaw sinyungse, Loz lauxsae youq gwnz sawdanbauj seuqdangq dwk sij gij mingzcoh swhgeij, lij yaenq aen yaenqfwngz saek hoengz dem. Daeg- ngeih aen fwngz yub myaiz, geq dab cienz nanup, cingqngamj 3 fanh maenz! 3 fanh ha, Loz lauxsae gunghcoz baenz lai bi hix caengz raen gvaq baenzlai cienz ne! Daegngeih gaem fwngz Loz lauxsae naeuz:“Daeggo ha, daeggo caen gou ha! Aenvunz gou ha!” Loz lauxsae naeuz:“Gaej gangj lo, ndaej bang couh bang mwngz!”

Gvaq geij ndwen ngoenz ndeu, lij dwg youq ndaw sinyungse, Loz lauxsae bae lingx cienzhong. “Doiq mbouj hwnj, ndaw cunzcez mwngz mbouj miz baenzlai cienz.” Gunghcoz yinzyenz naeuz. “Mbouj dwg fat cienzhong la?” “Fat lo, hoeng mbaw cunzcez mwngz deng dingz lo, gij cienzhong mwngz deng dawz bae boiz leihsik caez!” Aen gyaeuj Loz lauxsae “hoengh” yaep he, rox dwg aenvih maz lo, sikhaek daj soujgih Daegngeih. “Daegngeih ha, gij cienz mwngz ciq sinyungse leihsik deng gou boiz? Mwngz nanzdauh mbouj boiz leihsik ha?” “O, dwg mwngz ha Loz daeggo! Gou seizneix dawz mou daeuj Gvangjdungh baih- neix gai, gai ndaej cienz le caiq boiz mwngz! Cuengqsim ba! Seizneix gou lij muengz, couh yienghneix, caiqraen!”

Loz lauxsae dingq le siengj:Lwgmbauq neix vihmaz buet bae Gvangjdungh gai mou ne? Baihneix dou miz baenzlai boux buenqmou！

Bae mbanjranz Daegngeih baez cam, Loz lauxsae couh gyad naengh youq rog dou ranz Daegngeih gven dwk haenx. Vunz ndaw mbanj naeuz:“Daegngeih ciengx mou? Caengz ndaejnyi gangj gvaq, ‘max’ dauq doj gvaq geij baez, hoeng cungj dai caez, dingqnaeuz saw bae cibgeij fanh ne!” Loz lauxsae seizneix cij menhmenh singj gvaqdaeuj, youh daj soujgih Daegngeih, gvengih lo.

Daj seizhaenx hwnj, gij cienz- hong Loz lauxsae deng gaeu bae boiz sinyungse lo, ndwen cienzhong ndeu ngamq gaeuq boiz gij leihsik 3 fanh maenz aen geiqdoh ndeu, saedceij gvaq ndaej gig hoj. Daegngeih gvai lai lo! Loz lauxsae ndaq mbouj dingz! Loz lauxsae ciengzseiz daeuj henz ranz- vaih Daegngeih baenq bae baenq dauq, maqmuengh yawjraen miz gij saeh geizheih fatseng, roxnaeuz dwg yawjraen gungxciengz ranz Daegngeih haem miz gang cienz ndeu, roxnaeuz dwg yawjraen Daegngeih naengh youq ndaw ranz caj de daeuj aeu cienz, hoeng baezlawz cungj doeknaiq dauqma.

Geij ngoenz gonq gou youq Mbanjluzhu bungz raen Loz lauxsae, de naeuz dingq boux daj baihnamz guh hong ma naeuz Daegngeih mbouj rox guh maz fatcaiz lo, bi moq ndwencieng dauqma ranz couh lienz bonjcienz caeuq leihsik itheij boiz liux bae.

Gou riuriu mbouj gangj maz, cijdwg youq ndawsim naeuz: Hoh Loz lauxsae mwngz seizheiq ndei!