Mbwk:

Liz nanz mbouj raennaj,

Daj denva bae cam;

Nanz lai mbouj raen ciep,

Ndiep lai ma ranz damq.

Sai:

Ndaejnyi denva yiengj,

Gou hix siengj bae dingq;

Hoeng ndang gou miz bingh,

Yaek ciep ning mbouj ndaej.

Mbwk:

Dingqnaeuz mwngz baenzbingh,

Mbouj sij saenq daeuj naeuz;

Baenzbingh naek rox mbaeu,

Mbouj heuh gou daeuj yawj.

Sai:

Seiz hainduj baenzbingh,

Siengj sij saenq bae naeuz;

Seizde bingh lij mbaeu,

Lau naeuz mwngz gwnheiq.

Mbwk:

Rox daengz beix baenzbingh,

Gou buekmingh dauq ranz;

Fwngz gaem fwngz caiq cam,

Baenz nanz rox ngamq baenz?

Sai:

Gaej gwnheiq lo nangz,

Mbwn sang mbouj ndaej gouq;

Caet ngoenz mbouj gwn haeux,

Lij baenz vunz mbouj baenz?

Mbwk:

Song fwngz gaem cenj caz,

Ndenq gvaq laj denzva;

Heuh beix mbouj hai da,

Gaem cenj caz dai maez.

Sai:

Deq nuengx aeu cenj caz,

Raemxda doek gwnz demx;

Bingh bienq yak mbouj ndei,

Miz maz vah couh daengq.

Mbwk:

Fwngz swix gaem cenj caz,

Fwngz gvaz daemz najbyak;

Noh mwngz ndat lumj feiz,

Seizlawz cij rox ndei?

Sai:

Gwnzmbwn daeuj diemj bouh,

Mbouj ndaej lix lo nangz;

Mbwn diemj bouh daengz gvan,

Baenz caeuq nangz doxbiek.

Mbwk:

Beix dai nuengx doengz dai,

Guencaiz doxnem baiz;

Baiz gwnz singz laj singz,

Aeu baizlingz doxciuq.

Sai:

Mwngz aeu ndeindei youq,

Gou dai couh gag bae;

Dai couh banh sanglaex,

Geiq ndaej cangq ndok gou.

Mbwk:

Caih dai gonq dai laeng,

Daengz giuzyaem doxcaj;

Aengiuz guhdoih gvaq,

Caj baenz sueng baenz doiq.

Sai:

Ndiep lai hix mbouj ndaej,

Daej lai vaih raemxda;

Mingh dinj mbouj buenx yah,

Gvanbaz yaek doxbiek.

Mbwk:

Ndiep dwg gou ndiep lai,

Dai couh gou dai riengz;

Ce gou gag youq biengz,

Cij mwngz gvaq yaem bae?

Sai:

Bae haw rox bae mbanj,

Lij ganj dauq goq maex;

Mingh dinj gvaqbae yaem,

Nanz ndaej raen doxdauq.

Mbwk:

Ciuq songraeuz cingzngeih,

Fanhseiq cungj mbouj raen;

Caih beix gvaqbae yaem,

Mwngz dai gou soujhauq.

Sai:

Gwnzmbwn sou gou dauq,

Nanz ndaej bauq aencingz;

Daengz dai seiz lo gou,

Hoengq souj aen baizlingz.

Mbwk:

Gou daengq mwngz aeu geiq,

Gaej gwnheiq lai gvan;

Seiqneix mbouj caemh ranz,

Dai baenz fangz guhdoih.

Sai:

Gou dai mwngz aeu lix,

Vih mwngz gou gwnheiq;

Heiq mwngz gag ganq ranz,

Lij guenj gyoengq lwg’iq.

Mbwk:

Gouh dawh duenh bae ga,

Gvanbaz dai bae boux;

Ndek gou youq riengz laeng,

Diuq daemz dai cixbah.

Sai:

Gou dai mwngz doengz dai,

Mbwksai bouxlawz goq;

Bohmeh bouxlawz you,

Caeuz ngaiz bouxlawz cawj?

Mbwk:

Mwngz ansim bae yaem,

Fanh saeh cungj miz gou;

Bouxgeq caeuq lwgnyez,

Gyoengqde gou daeuj guenj.

Sai:

Gorangz hwnj daengz byongh,

Daengz duenh de couh reuq;

Mwngz baenz maiq lij coz,

Yousim mwngz gvaq hoj.

Mbwk:

Mwngz caih gou souj maiq,

Gwnzmbwn hix rox yawj;

Gvaq seiq haj bi dem,

Lwg raeuz rox danggya.

Sai:

Lwg raeuz caemh roxsoq,

Gijmaz cungj guh ndei;

Goq gyaranz raeuz miz,

Mwngz cien bi mbouj you.

Mbwk:

Gwnzmbwn caemh roxsoq,

Hix hawj raeuz miz lwg;

Lwg miz ndaej swnj ciuh,

Ciuhneix raeuz simcuk.

Sai:

Gwnzmbwn hix rox yawj,

Hawj gou caeuq mwngz gvaq;

Ciuhneix mwngz gaej lumz,

Gou vuenyungz beij doih.