Beix:

Lijyoz Auyinvei,

Miz geij bak ginhbaiz,

Guek raeuz ndaej geijlai,

Nuengx mwngz cai baez yawj.

Nuengx:

Lijyoz Auyinvei,

Miz ginhbaiz geij bak,

Seizneix guek raeuz ak,

Mbouj bak doeng geijcib.

Beix:

Gaiqgonq youq Lwnzdunh,

Ceng ndaej mingz daihngeih,

38 ginhbaiz,

Cwngqmingz guek raeuz maenh.

Nuengx:

Ceng ndaej gij ginhbaiz,

Vunzlai bouxboux rox,

Gaiqneix youq Lijyoz,

Ciuq soq ndaej lai gvaq.

Beix:

Gij ginhbaiz hainduj,

Guek raeuz bouxlawz ndaej?

Dwg danhangh aen lawz?

Nuengx gangj hawj beix dingq.

Nuengx:

10 mij gisoujciengh,

Dahsau Cangh Mungsez,

Vunz beij mbouj gvaq de,

Ginhbaiz ce de lingx.

Beix:

Gij ginhbaiz daihngeih,

Nuengx ngeix bouxlawz ndaej?

Dwg danhangh aen lawz?

Nuengx gangj hawj beix dingq.

Nuengx:

Minjyaz caeuq Dingzmau,

2 dah sau naengzganq,

Youq 3 mij diuqbanj,

Hangh neix ndaej ginhbaiz.

Beix:

Gij ginhbaiz daihsam,

Cam nuengx bouxlawz ndaej?

Nuengx yawj sinhvwnz caez,

Gaej naeuz mwngz mbouj rox.

Nuengx:

Geb miz 8 bi cingj,

Lungz Cinghcenz gingznaek,

56 goenggaen,

Caiq aeu ndaej ginhbaiz.

Beix:

Gij ginhbaiz daihseiq,

Song boux diuqraemx ndaej,

Songde dwg bouxlawz?

Nuengx naeuz hawj beix dingq.

Nuengx:

Cinz Aisinh Linz Yoz,

Dungcoz ndei dahraix,

Hangh 10 mij diuqdaiz,

Ginhbaiz dwg gyoengqraeuz.

Beix:

Daihhaj gij ginhbaiz,

Nuengx cai bouxlawz ndaej,

Dwg danhangh aen lawz?

Nuengx gangj hawj beix dingq.

Nuengx:

Hangh ap 200 mij,

Geijlai vunz doxsaiq,

Sunh Yangz ap ak lai,

Ginhbaiz dwg de ndaej.

Beix:

Daihroek gij ginhbaiz,

Nuengx cai bouxlawz ndaej?

Dwg danhangh aen lawz?

Nuengx gangj hawj gou dingq.

Nuengx:

63 goenggaen,

Raen gingznaek doxbeij,

Dahsau heuh Dwng Veih,

Doxbeij ndaej ginhbaiz.

Beix:

Daihcaet gij ginhbaiz,

Nuengx cai bouxlawz ndaej?

Dwg danhangh aen lawz?

Nuengx gangj hawj gou dingq.

Nuengx:

Yozlinz caeuq Veiyaz,

2 dah sau ak lai,

Hangh 10 mij diuqdaiz,

Ginhbaiz dwg gyoengq dawz.

Beix:

Daihbet gij ginhbaiz,

Nuengx cai bouxlawz ndaej?

Dwg danhangh aen lawz?

Nuengx gangj hawj gou dingq.

Nuengx:

Daeg mbauq Siz Ciyungj,

Gijcung caen dwg haenq,

69 goenggaen,

De maenh ndaej ginhbaiz.

Beix caeuq nuengx：

Laeng lij miz ndeiyawj,

Ciengjbaiz byawz aeu ndaej,

Cungj dwg hanhlwed lae,

Vih gyoengqde bekfwngz.