Heujnaj gou loenq le song gaiq, baez riu couh loh’ok song aen congh, yakyawj dangqmaz.

Ngoenz singhgizroek, gou youq bakdou siujgih guhcaemz, yawjraen boux daxgoeng hendou, gou couh hwnjbae dongx de. Daxgoeng hendou daengx naj riunyumj doiq gou naeuz: “Yenzyenz, mwngz dwg baenz- lawz yawj ranz ha, aen douhung ranz mwngz cungj deng bouxwnq caeg bae lo……” Caengz caj daxgoeng gangj sat, gou couh gipgip muengzmuengz buet ma ranz, ndawsim gag siengj: Dai lo, douhung deng vunz caeg bae lo, danghnaeuz bouxcaeg……gou mbouj gamj sijsaeq siengj, gou baegfofo buet hwnj roek laeuz baez yawj, douhung ranz gou lij ndeindi’ndi, dou gven ndaej ndaet dangqmaz. Hw! Daxgoeng hendou baenzlawz yienghneix gangjriu ne? Gou hujdengdeng buet bae cam de. Mbouj siengj daengz daxgoeng hendou riuhaha naeuz:“‘Douhung’ ranz mwngz mbouj couhdwg heujnaj mwngz ha?” Dingq daxgoeng yienghneix gangj, gou mbouj ndei eiqseiq riu lo.

(ngeih nienzgaep Liuz Yiyenz)