Sei Diuqfoux Ciengqgo Vehdat Bouxcuengh 《Byaraiz》 Nem Bienmoq Lizsij

Heiqcuengh 《Fungz Swjcaiz》 Yaek Caeuq Bouxyawj Soujduh Raennaj

Bonjbauq siusik (gicej Cinz Yajniz) gaiq daihhaj daengx guek saujsu minzcuz vwnzyi comzyienj youz Guekgya Minzveij、 Vwnzvabu、 Guekgya Sinhvwnz Cuzbanj Gvangjden Cungjgiz、 Baekging Si Cwngfuj cawjbanh haenx yaek youq 8 nyied 18 hauh youq Baekging haimuq. 8 nyied 18 hauh daengz 9 nyied 14 hauh, yaek miz 35 aen daiqbiujduenz daj daengx guek gak dieg daeuj haenx daiq 43 daiz heiqmoeg daengz Baekging, vih beksingq soujduh yienj ngaizhoengh yisuz ndeiyawj. Doenghgij heiqmoeg neix baugvat gofoux、 heiqgofoux、heiq saujsu minzcuz caeuq heiq deihfueng Bouxgun daengj yisuz cungjloih, lij baugvat 《Byaraiz》 daengj ciengqgo diuqfoux loih heiqmoeg 22 daiz, caemhcaiq Heiqcuengh 《Fungz Swjcaiz》 daengj heiqmoeg heiqloih 21 daiz dem. Daengzseiz, 43 daiz heiqmoeg neix yaek laebdaeb youq Baujli Heiqyienh、 Minzcuz Heiqyienh、 Denhgyauz Heiqciengz daengj 11 aen heiqciengz yienjok 86 ciengz.

20 hauh, sei diuqfoux ciengqgo vehdat Bouxcuengh 《Byaraiz》youz Guengjsae Yenjyi Cizdonz caeuq Guengjsae Gofoux Heiqyienh cauxsij yienjok haenx yaek baez daih’it youq Baekging yienj, laeb- daeb song haemh youq Baujli Heiqyienh yienjok, yisuz yienh’ok gij yinxdaeuz daegbied seiqgyaiq vwnzva yizcanj vehdat Byaraiz caeuq gij dungxcaiz hungmbwk cojcoeng Bouxcuengh.

Ciuq cam rox, Guengjsae bauqsoengq heiqmoeg 《Byaraiz》 caeuq 《Fungz Swjcaiz》 youq 2015 nienz 12 nyied ndaej swhgwz camgya gaiq daihhaj daengx guek saujsu minzcuz vwnzyi comzyienj. Swcigih Dangjveij、 Cwngfuj gig yawjnaek hong gih raeuz camgya daengx guek saujsu minzcuz vwnzyi comzyienj, youq bineix 6 nyied gapbaenz aeu swcigih fucujsiz Vangz Siyungj guh donzcangj, Swcigih Minzveij cujyin Luz Yenbenj、 Vwnzvadingh dinghcangj Vangz Yij、 Sinhvwnz Cuzbanj Gvangjdengiz gizcangj Bungz Gangh guh fudonzcangj, bouxyienj daengz 300 lai boux. Seizneix gaenq guh ndei hong caepcawq. Bienmoq lizsij Heiqcuengh 《Fungz Swjcaiz》 yaek youq 9 nyied 9 daengz 10 hauh youq Baekging Cangzanh Heiqyienh yienjok, daiz heiq neix yaek youq baihlaeng laebdaeb guh bauqlwnh.