Duzgaeq buet hwnj bya,

Duzma diuq roengz naz;

Duzbit swenjgaga,

Cwzvaiz maj bizbwd.

Ndaw suen miz gaeu fanh,

Lwgmanh giet ndaej hoengz;

Byaek heu mwn lumj ndoeng,

Gocoeng sang youh rang.

Ndaw naz go haeux henj,

Duhhenj giet baenz foengq;

Lwgmaenz hung youh hoengz,

Lwgbiek mboeng youh van.

Makdauz venj gwnz go,

Henz loh makbug lai;

Makit dawz bae gai,

Angq vaih vunzguhnaz.

Haemhgonq gwn nohvaiz,

Gwnz daiz caemh miz bya;

Haemhneix gwn nohma,

Caiq gya ndaek ga yiengz.

Lajmbanj gvaq ndaej ndei,

Saedceij ngoenz beij ngoenz;

Boux ndaw singz dahoengz,

Lij moengh ma lajmbanj.