Hakdoj laekgaek lai,

Ranz fouq miz gyoengq cai;

Hak mbouj guenj dieg de,

Caih baihlaj laihdai.

Vunz giz hoj gig lai,

Bibi lau diencai;

Ngoenzngoenz gyoengq cai haep,

Haemz hak lau soujhaih.

Dahsien gwnz mbwn rox,

Simgaenj lumj deng dot;

Hoeng diendingz gvidingh,

Dah mbouj ndaej bangcoh.

Aen sim dahsien soh,

Caj daengz bing simco;

Laeglemx roengz gwnzbiengz,

Bienq sai cang hak moq.

Daenj buhhak ciuzdingz,

Gwnz gyaeuj miz mauh nding;

Beksingq gvaiq raen de,

Gyoengq cai haen fukmingh.

Hakdoj sim de ging,

Lau hak hung vunz cingq;

Seizneix hak hung daeuj,

Gou baenzlawz bae bingj?

Gyoengq cai baiz youq dou,

Laeuj van byaek ndei coux;

Hak hung mbouj yawj neix,

Sim hakdoj engq you.

Hak bak cam diegfouq.

Hakdoj gangj diegfouz;

Yawj ranz de couh rox,

Naz miz cien fanh moux.

Hak hung fok hak neix:

“Mwngz gangj gijmaz leix;

Hak fouq mbouj dwg fouq,

Beksingq fouq cij ndei.

Byaek daiz neix dij geij,

Bouxhoj guh seiqgeiq;

Mwngz gag laekgaek lai,

Beksingq miz maz ei.

Mwngz yawjyawj seiqfueng,

Geijlai ranzhoj vuengz;

Bibi lau diencai,

Ngoenzngoenz cai haep muengz.

Danghnaeuz mwngz lij guh,

Hakdoj gaej siengj guh;

Gou lwnh ciuzdingz nyi,

Dued hak mwngz bae lu.”

Hakdoj lau vah de,

Mieng naeuz soengq haeuxmeg;

Hawj beksingq ndaej gwn,

Muengh hak hung nyiuz de.

Hak hung bongx daiz daenh:

“Neix suenq gijmaz maenh,

Yw rog mbouj yw goek.”

Daengx ndang hakdoj saenz.

Hak hung youq 3 ngoenz,

Cij gangj vah geij coenz;

Hakdoj couh gaij ndei,

Gyoengq cai muengz ndaej hoen.

Dahsien angqyangz ma,

Doq deng gyoengq bing gaz;

Naeuz de famh dien’gvi,

Hojlienz yaek souhfad.