Mwhhaenx gou ndaej haj bi, miz ngoenz ndeu, lauxsae youwzyenz doiq dou naeuz:“Sou couh lumj gova iq nei, aeu lai rwed raemx、dwk bwnh, cij maj ndaej youh sang youh hung……”

Gou baez dingq couh angq lo: “Deng ha, nanzgvaiq gij va ndaw ranz gou baenzhaenx gyaeundei, laxlawz dwg daxgoeng gingciengz rwed raemx、dwk bwnh cij yienghneix gyaeundei. Gou hix ndaej yienghneix majhung bw!”

Gangj guh couh guh, ma daengz ranz, gou couh hag gij yiengh daxgoeng ndaem va, sien genj aen batva hung ndeu, yienzhaeuh youq ndawhongh gud di namh cuengq youq henz. Cunjbei ndei le, gou duet haiz caeuq mad bae, ndwn haeuj ndaw batva, aeu namh hoemq din, yienzhaeuh aeu aen rokraemx ndeu, sien rwed din, gaendwk rwed gyaeuj. Raemx daj gwnz gyaeuj lae roengzdaeuj, liengzsisi, gou baez saenznit, caen gyoet ha! Hoeng siengj daengz couh yaek majhung, ndawsim gou mbouj rox geijlai angq ha!

Seizhaenx daxboh cingqngamj roengzban ma daengz ranz, raen gou ngawzngwd ndwn youq laj ndit, vanzlij sohsoh ndwn youq ndaw batva, mbouj rox fatseng gijmaz saeh, couh dawz gou daj ndaw batva ngengh rag okdaeuj. “Mwngz ndwn youq ndaw batva guh gijmaz?” Daxboh gaenjgip dwk cam gou, “Yo, byoem hix dumz lo?” Gou haetcwi mbat ndeu naeuz:“Lauxsae naeuz……naeuz, dou aeu lai……lai rwed raemx、dwk bwnh, cij……cij majhung, haet……haetcwi!” Daxboh dingq le, riu dwk dungx in bae. Gou youq henz yawj cix gig geizheih. Daxboh itmienh riu itmienh rag gou daengz naj aengingq, gou yawjraen ndaw gingq byoem gou dumzdwddwd nem youq gwnz gyaeuj, aennaj youh dumz youh uq, lij miz namh dem, couh lumj duzmeuz ngamq daj ndaw mieng uq vax hwnjdaeuj nei. Mboujgvaq gou gag roxnyinh swhgeij lumjbaenz beij gyanghaet maj sang di lo, couh gag gangj gag naeuz:“Gij vah lauxsae lij caen lingz bw!” Daxboh riu dwk dawz buh hawq daeuj hawj gou vuenh, youh bang gou uet byoem hawq, yiengzhaeuh gvet aenndaeng gou naeuz:“Lwg huk, lauxsae mbouj- gvaq dwg yungh daeuj beijlumj, mwngz baenzlawz ndaej dang caen ne? Mwngz gaej gaenj, mwngz itdingh majhung.”

Seizneix, gou couh yaek siujyoz bizyez lo, hoeng gij saeh seiziq lij ciengzciengz sawj gou siengj hwnj, moix baez siengj hwnj gij saeh neix, gou cungj nyaenx mbouj ndaej riu ok sing daeuj.

(roek nienzgaep Huz Sezcingz)