Caet nyied, dwg aenndwen doxbiek. Cijdwg, giz mbouj doengz dwg, yienzlaiz gou dwg yawj bouxwnq biek hagdangz, biek gyoengq doengzhag lauxsae youq doxcaez haujlai bi haenx, hoeng seizneix, lwnz daengz gou yaek biek gyoengq doengzhag caeuq lauxsae lo.

Ngoenzneix dwg dou youq ndaw hagdangz ngoenz ceiq doeklaeng, gyoengq doengzhag cungj youq ndaw ban nyaengq sij vah louzniemh, yawj gyoengq doengzhag gij yienghsiengq sij mbouj ndaej doxbiek haenx, simcingz gou hix gig naekcaem.

Gou souh mbouj ndaej cungj ciengzmienh neix, byaij ok rog gyausiz bae. Gou fuz baenghlae, menhmenh byaij roengz lae bae, baenghlae yienzbonj gou roxnyinh gyoetgyat haenx, seizneix cix bienqbaenz gig raeujrub, gou byaij gig menh, gig mbaeu, dou lij dwg gyoengq lwgnyez baez roengzdangz couh youq gwnz lae buet hwnj buet roengz haenx lwi?

Geiq ndaej gaxgonq mbouj dwg yienghneix bw, moix baez hwnj lae roengz lae, dou cungj dwg sam boux haj boux baenz gyoengq youq gizneix buet hwnj buet roengz, cungj siengj boux daih’it buet ok gyausiz, daeuj- daengz gwnz cauhcangz guhcaemz guh’angq. Cigdaengz daj giz gyae yawjraen cizcouh lauxsae, dou cij lumj seizneix andingh roengzdaeuj.

Daeujdaengz cauhcangz hag- dangz, din gou couh gag dingz roengzdaeuj. Lumh goufaex henz bakdou hagdangz, yawj aen cauhcangz sugsed haenx, gou cingq yawj dwk maezmwd, “gofaex hung neix ceiq hawj gou siengj hwnj doenghbaez lo” baengzyoux henzndang yaengyaeng naeuz. Dwg ha, youq laj go faex neix, dou dohgvaq le cingjcingj roek bi ndwenngoenz.

Yawj aen cauhcangz hoengq- gvangq, gou siengj hwnj aen seizhah gak saek gak yiengh haenx, ngoenz haenx, hagdangz cingq gawjhengz gogenhcauh doxdax, ban dou vih baez doxdax neix, daihgya roengzrengz bae lienh. Roengzdangz lienh, cuengqhag le lienh, gyoengqdou youq gwnz cauhcangz mbouj rox doek le geijlai hanh ha, doeklaeng, ban dou ndaejdaengz daih’it mingz! Ngoenz haenx seizhaenx, gij riunyumj lauxsae, gou seizneix lij geiq ndaej cingcing cujcuj; ngoenz haenx seizhaenx, gij angqriu angqhemq doengzhag lij rwenz youq henz rwz gou. “Gou caiq hix mbouj ndaej daeuj gizneix guhcaemz lo, caen mbouj siengj biek bae ha!” Dingq boux doengzhag gangj coenz vah lumj daej neix, raemxda gou hix aeng rim lwgda lo.

Cingq dwg seiz hwnjdangz, seizneix cwnggyau cujyin byaij okdaeuj, de yawjyawj dou, nanz ndaej riu le riu, gijmaz hix mbouj gangj, couh byaij dauqma lo, yawj baihlaeng de, gou bingzseiz miz di haemz de haenx, seizneix gingqyienz gamj- daengz gig caenciet.

Sing lingz cuengqhag yiengj lo, doengzhag ban iq aemq daehsaw cung okdaeuj, yawj gyoengqde baenzneix angqyangz, gou miz di hozhaenz lo, ngoenzcog, gyoengqde lij ndaej lumj seizneix ityiengh angqyangz daeuj- daengz aen cauhcangz neix, hoeng gou……

Roek bi, youq aen hagdangz neix, gou daj boux lwgnyez moengjdoengj, bienqbaenz boux lwgnyezhung roxsoq. Caiqraen lo, aen hagdangz gyaeundei gou! Caiqraen lo, ndwenngoenz siujhag nanzlumz gou! Gvaq haujlai bi le, mwngz itdingh baenz giz funghgingj ceiq gyaeundei ndawsim gou.

(roek nienzgaep Vangz Yenz)