Bineix doxdaeuj, Denzlinz Yen aeu lajmbanj demloeg、 guhndei vanzging、 bouxguhnaz laisou guh muzbyauh, dajndaem gij dinfaex mboujdan ndaej loegvaq youh ndaej gyalai souhaeuj haenx, haenqrengz doicaenh “loegvaq aenmbanj”, roengz- rengz dajcaux gij gingjsaek gyaeundei “it mbanj it gingjloeg”.

Vih daezsang aenmbanj loegvaq binjcaet, gaijndei swnghdai vanzging, saedbauj ciuqseiz guhsat yihvu dajndaem dinfaex. Denzlinz Yen aeu seiqhenz mbanj、 song henz roenloh、 laeng ranz naj ranz guh demloeg cungdenj, dingh’ok biujanbaiz guhhong dajsuenq, saedbauj ciuqseiz guhsat guhhong neiyungz gak seizgan diemjciet, gak fucwz danhvei hix dawz yihvu guhhong loegvaq aenmbanj guh faengej, lozsiz daengz gak bouxfucwz, vih saedbauj ndaw bi guhsat dajndaem dinfaex caeuq gij yihvu loegvaq aenmbanj dwkroengz giekdaej maenh- ndei.

Ciuq cam rox, bineix Denzlinz Yen gaenxmaenx ceng’aeu ngaenzcienz hwnjguh swcigih “loegvaq aenmbanj” diemjguhyiengh, dajsuenq loegvaq mbanjguhyiengh 40 aen, dajsuenq loegvaq aenmbanj itbuen 600 aen. Seizneix aen yienh neix gaenq guhsat gij yinvu loegvaq 21 aen mbanjguhyiengh loegvaq, demlai loegvaq mienhcik 116.5 moux, dajndaem loegvaq dinfaex 7747 go; guhsat gij yinvu loegvaq 510 aen mbanj itbuen loegvaq, demlai loegvaq mienhcik 266.1 moux, dajndaem loegvaq dinfaex 53658 go.

(Yenj Cinbyauh/冉俊彪)