Youq Bingzgoj Yen Seiqdaemz Cin Yinsanh Cunh miz aen mbanj swhyienz he heuhguh Daemzmax. Gangj daengz vihmaz heuhguh Daemzmax ne, ndaw mbanj neix miz bouxlaux he caeuq gou gangj:“Baenzneix heuh miz gaengawq bw! Aen mbanj baihnaj miz dieg gumh he, gingciengz miz raemx comz haeujbae. Cojcoeng dou roxnyinh aen dieg neix gig ndei, couh lumj aen ruh sam duz max doengz ndoet raemx nei. Gvaqlaeng, gyoengqvunz couh vat gizneix baenz aen daemz ndeu.” De vix aen dingjbya doiqnaj Mbanjdaemzmax 8 bak mij gyae he yienghneix cam gou:“Mwngz yawj goengq bya neix lumj mbouj lumj duz max ndeu?” Gou ngiengxgyaeuj baez yawj, caen miz di lumj duzmax bw. De youh yinx aen baihlaeng mbanj baihswix caeuq baihgvaz naeuz:“Song baih neix cungj miz song goengq bya, cungj dwg cungqgyang gumh roengzbae, lumj song aen anmax.” Ndigah aen mbanj neix couh heuhguh Daemzmax. Aen coh mbanj neix couhdwg gaengawq gij deihseiq daeuj heuh. Doeklaeng, miz boux deihleix sienseng he daeuj daengz mbanj neix baez yawj, nyinhnaeuz baihswix goengq bya baihlaeng aen mbanj caeuq baihgvaz wnggai yawj baenz duz max ndeu, aen dieg neix dwg haj duz max doengz ndoet aen ruh cij deng. Mboujguenj dwg sam duz max roxnaeuz haj duz max, aen coh mbanj neix cungj dwg caeuq daemz caeuq max mizgven.