Youq gij ndaejgeiq gou, daxmeh gaenq haujlai nanz mbouj riu lo. Dauqdaej baenzlawz guh cij sawj daxmeh riu ne? Gou gag doiq swhgeij naeuz, itdingh guh di gijmaz hawj daxmeh riu.

Miz ngoenz ndeu, gou iek daxmeh bae gunghyenz liz ranz mbouj gyae haenx. Aen gunghyenz neix miz gij dauqngeix seiziq gou. Lauheiq, vuenh aen vanzging ndeu daeuj youzbyaij, simcingz daxmeh aiq ndaej ndei bw.

Daengz ndaw gunghyenz, gou caeuq daxmeh byaij youq roen iq ndaw geh faex. Daxmeh naeuz: “Mbouj roxnyinh daengz, va- gveiq cungj hai lo.” Daxmeh ngamq gangj sat, gou ngiengx gyaeuj muengh hwnj gwnz bae, dwg ha, baenz benq baenz benq va’gveiq youq ndaw mbawfaex heu yienh ndaej daegbied singjda, fat ok cungj vahom damhdamh ndeu, lij miz sam duz roeglaej youq laj faex ra gwn. Heiq vahom riengz rumz biu bae biu dauq, sawj vunz sim sangj uk singj. Mbouj rox vih gijmaz, moix baez nyouq daengz heiqhom va’gveiq, cungj miz cungj feih gig sug ndeu, cungj sawj gou siengj hwnj seiziq. Gou ngaezngwd dwk ndwn youq mbouj byaij, yawj coh daxmeh. Daxmeh naengh youq laj go’gveiq, aeu gaiq fwngz cocat de lumh gofaex, riu naeuz:“Mwh mwngz lij iq ha, ceiq gyaez daengz laj gofaex neix guhcaemz lo, dang- seiz gizneix lij mbouj miz daengq naengh, song boux raeuz couh naengh diegnywj laj gofaex itmienh gangjgoj itmienh guhcaemz……”

Dang daxmeh gangj ok coenz vah neix seiz, gou lumjbaenz rox le gijmaz nei. Hix cingq dwg coenz vah neix, gej ok gij ngeizvaeg gou—— gou mbouj siengj daengz gvaq, sawj daxmeh bienq ndaej vaiqvued cij dandan dwg “doxbuenx”! “Yienghneix raeuz caiq daeuj guhcaemz baez ndeu ba!” Coenz vah neix gou siengj hix mbouj siengj couh gangj ok bak daeuj lo. Gou yawj coh daxmeh, daxmeh caen lumj boux lwgnyez ndeu.

Daxmeh riu lo, riu ndaej geijlai angq ha! Seizneix gou rox lo: Bohmeh lajmbwn cungj caeuq daxmeh gou ityiengh, gyoengqde soqlaiz mbouj siengj gvaq yaek daj lwgnyez gizde ndaej daengz gijmaz, siengj aeu haenx lauheiq cij dwg lwgnyez daeuj buenx caeuq hauq- swnh.

(roek nienzgaep Vangz Yizyinz)