“Ngoenzneix cozyez ma ranz sij dwg veh gyaeqgaeq.”

Lauxsae duzyiengz ngamq senhbu, gyoengq doengzhag couh mwngz coenz gou coenz ngeixlwnh hwnjdaeuj: “Baenzlawz veh ha?” “Yungzheih veh hane, veh aen luenz he couh ndaej lo.” Lauxsae duzyiengz naeuz: “Yawj lumj yungzheih, yaek veh ndei mbouj yungzheih bw. Ngoenzcog gou cingj boux bingzveij saenzmaed he daeuj dang bingzveij, yawj byawz veh ndaej ndei.”

Duzlingz yawjyawj aenmakdauz, gyaeqgaeq dwg luenz, makdauz caeuq yiengh luenz ca mbouj geijlai, yienghneix de couh ciuq yiengh makdauz nyinhcaen bae veh.

Duzdouq yawjyawj lauxbaegnding, lauxbaegnding luenzlili, caeuq gyaeqgaeq ca mbouj geijlai, yienghneix de ciuq yiengh lauxbaegnding nyinhcaen bae veh.

Noucoengz gag siengj: Gyaeqgaeq dwg mehsimj gaeq ok okdaeuj, de itdingh rox baenzlawz veh. Yienghneix de ra daengz mehsimj gaeq. Mehsimj gaeq hawj noucoengz aen gyaeq he, heuh de sijsaeq cazyawj miz maz daegdiemj le caiq veh.

Ngoenz daihngeih, gyoengq doengzhag aeu mbawveh gyau hawj lauxsae duzyiengz. Lauxsae duzyiengz cingj bingzveij saenmaed mehsimj gaeq okdaeuj. Mehsimj gaeq dawz hwnj gij veh daihgya veh haenx, baenz mbaw baenz mbaw sijsaeq yawj, duzlingz veh haenx dwg makdauz mbouj miz gaenq, duzdouq dwg veh lauxbaeg mbouj miz mbaw, mehsimj gaeq ngauzngauz gyaeuj.

“Couh mbaw neix veh ndaej ndei.” Mehsimj gaeq aeu mbawveh noucoengz hawj gyoengq doengzhag yawj: Gyaeuj he luenz, gyaeuj he iq, daengx ndang raeuzrwdrwd.

Lauxsae duzyiengz naeuz:“Mbouj sijsaeq cazyawj couh veh mbouj lumj bw.” Gyoengq doengzhag ngaekngaek gyaeuj, cungj rox lo.

(ngeih nienzgaep Banh Yij)